86岁余慕莲瞓唔到食唔落超忟憎：就嚟死喇 唔惯住护老院暴瘦惊现「鸡爪手」丨独家

因为家佣要返印尼探亲一个月，86岁无儿无女的余慕莲(鱼毛)被迫初体验护老院生活，面对晚上要着尿片、隔日由姐姐帮她冲凉，鱼毛姐周身唔聚财，瞓唔到又食唔落，住唔够一个月就瘦到皮包骨落晒形，被假新闻老屈加上冇得自由自在喺屋企翻睇《中年好声音2》更令她忟憎狂呻：「就嚟死嘞…」更因太闷，唔觉意大爆娱圈陈年秘闻。采访：方骞平 摄影：朱伟彦

喺老人院嘅鱼毛姐变得好忟憎，但要忍住唔可以发脾气。

鱼毛姐住系有窗双人房。

喺老人院每日行唔够100步。

带埋播音机听粤曲解闷。

鱼毛姐尽量起身行吓。

3年前余慕莲患上肺纤维化及血液炎曾留医深切治疗部，健康每况愈下。为免行动不便的她独留家中会出意外，吴丽珠安排她入住一间位于港岛区，开业仅半年的新净护老院，鱼毛姐所住的是有窗双人房，环境及卫生都唔差。不过，《头条日报》记者往探望鱼毛姐，发现她冇晒心机及食欲，更暴瘦惊现「鸡爪手」。

老人院创办人了解余毛姐所需。

有布帘板间房。

双人房企理乾净。

加设闸口，慎防老人家会走失。

每位老人家有专用枱凳，又有大电视及麻雀枱。

闷闷不乐的余毛姐形容处于等死状态：「朋友陪我去食嘢，都食唔落，唔想去，医生话我过瘦唔够营养，叮嘱每日要饮3次营养奶。嗰日覆完诊顺道返屋企交管理费，连保安都追问我『点解瘦咗咁多？』我就答佢『就嚟死喇！』」院方怕她跌亲，要求全日用尿片，但鱼毛话唔惯，只肯晚上用：「半夜急醒被迫屙落条片，有时唔止一笃，所以『噏住』，几辛苦呢！因为瞓唔安个人变得好忟憎，个样残到唔想影相，仲出白发。」提到护老院生活，她透露隔日有姐姐帮女院友冲凉：「但咪搞！重要部位自己捽返，平时喺屋企都系自己冲凉，佣人姐姐只帮我着衫。」

鱼毛姐展示瘦到皮包骨。

鱼毛姐惊现「鸡爪手」。

瘦猛猛。

因为食唔到嘢，每日要饮3次营养奶。

有时会加入饼仔。

3年前余慕莲患上肺纤维化，所以咳不停。

鱼毛姐残到唔多想影相。

鱼毛姐忟自己唔可以忟人哋。

老友林建明带梳蕉去探望。

沙姐陪余毛姐食糖水下午茶。

《中年2》Fans爱古淖文

𠵱家鱼毛姐最挂住屋企：「可以自由活动，扶住去厕所，每朝落街踩单车健身器，嗰度啲公公婆婆好锡我，会帮我霸定位；仲久不久去附近戏院睇早场，想食乜就叫姐姐买…」她自爆最近喜欢能歌擅舞的古淖文，好想返屋企重温《中年好声音2》，又觉得《福禄寿训练学院》好好笑：「我冇煲剧，睇喊苦喊忽嘅剧会唔开心，自己都够惨啦，从来都冇人爱，细佬妹全部系同父异母及同母异父，有事搵家姐，冇事茄哩啡，最憎老母抛夫弃女嫁90几次，连上官玉都取笑过我『你嫁唔去喇！因为你老母嫁埋你嗰份…』唉！唔讲佢哋，会唔开心…所以决定将啲钱捐晒出去，仲打算同教友夹钱帮教会起教堂。」

鱼毛姐喺屋企最有胃口。

喺屋企半夜可以慢慢起身去屙夜尿。

个人自由自在。

返家就能回到正常生活。

平日每朝都会落街做运动。

会朝朝做半小时运动。

唔做运动会周身唔聚财。

平日有家佣陪住出入。

鱼毛姐一讲起妈妈就好激气。

上官玉都取笑过鱼毛姐嫁唔出！因为阿妈嫁埋佢嗰份。

《中音2》冠军古淖文是鱼毛姐近期最爱。

又觉得《福禄寿训练学院》好好笑。

睇新闻被屈越睇越忟

由于院友早睡早起，鱼毛姐带埋播音机听粤曲解闷，亦会靠手机上网打发时间，点知越睇越忟：「有啲报道好衰，话我以前穷到住劏房及要问人借钱，嗰啲死人头唔系记者系作者。」她坦言30几年前好悭，做完《欢乐今宵》都唔舍得坐的士回家，而且租住有5伙人的分租房：「我租嗰间房几好㗎，有14寸电视机。」她又申冤：「我使鬼搵人借钱咩？只系我借钱畀人，我旺角间屋都值几百万啦。」鱼毛姐再爆某个老牌艺人曾经系佢债仔：「年前佢有病，但死要面住浸会医院，我都系入政府医院咋。每周医院追数时，佢就发脾气话『都出唔到院点找数呀？』最后我帮佢碌住卡先，结果佢分期3年，每月还$2000。」鱼毛姐又爆某佢宠坏咗个仔，当年每次饮宴后都打包食物畀个仔，儿子已近20岁，「希望佢长命啲，佢死咗个仔唔知点算好。」

余慕莲获古天乐颁「杰出演艺大奖」。

余毛姐年轻时泳衣照。

余毛姐少女look。

余毛姐向来好悭家。

余慕莲捐出10多万长期服务金，在贵州兴建「余慕莲希望小学」。

顶唔顺曾江超大男人

因为余毛姐好闷，讲旧史停唔到，除某个老牌艺人，亦顶唔顺已故曾江的大男人举动：「当年曾江中途加入《真情》当正自己系主角，剧中我饰演佢秘书，有钱又有学历，但竟然要求我对佢发姣，导演又唔敢逆佢意，真系讲多无谓，我唯有向监制提出，快啲写佢锺意好姨(薛家燕)，我就同好nice嘅 Joe Junior 。」另外，对住「深情探监KOL」李龙基亦冇乜好感，坦言难顶对方70几岁仲染粉红头：「离晒谱！佢最锺意搵𡃁妹，以前嗰个女友都好后生。」

因为曾江要求，鱼毛姐在《真情》被逼发姣。

唯有向监制提出，快啲写佢曾江锺意好姨(薛家燕)一对。

又顶唔顺李龙基70几岁仲染粉红头。

《星岛申诉王》推出全新项目「我要赞佢」栏目，现诚邀市民投稿赞扬身边好人好事，共建更有爱社区。立即「我要赞佢」︰https://bit.ly/3uJ3yyF

想睇更多精彩内容，请立即浏览「区区有申诉」活动专页，https://bit.ly/41hgS9E

紧贴最新最快新闻资讯，请立即下载星岛头条App：https://bit.ly/3Q29Vow