揭李琳琳息影33年复出演女同志始末 杨曜恺煲旧剧搵演员 区嘉雯赞好主动锡够投入丨独家

杨曜恺（Ray）导演继2019年的《叔·叔》后，在柏林影展夺得被誉为「同志电影奖项最高殊荣」泰迪熊奖的新作《从今以后》，再以长者同志为主题，跟区嘉雯再合作，还成功邀得冇拍戏33年的李琳琳出山拍港产片。脑海出现李琳琳，Ray全靠睇旧电视剧《轮流转》和《民间传奇-梁山伯与祝英台》。区嘉雯大赞李琳琳演技完全无生疏，跟她演绎相交逾40载的情侣相当投入，拍亲热戏更作出主动，是一次绝佳的拍摄体验。采访：杜杜 摄影：罗安强

嘉雯姐赞Ray安排工作坊外，还为演员准备人物小传。

电影在柏林影展夺得被誉为「同志电影奖项最高殊荣」的泰迪熊奖。

嘉雯姐有到柏林影展出席世界首映，但因工作提早返港，未能见证领奖。

导演制作《从今以后》并非因为长者男同志电影《叔·叔》成绩骄人，全因2020年他去有关同志遗产权益的讲座，提到同志伴侣离开后，留低的伴侣跟对方的家人关系决裂，「3对情侣同对方家人本来都好亲密，放假一齐去玩，亲友啲仔女会喺佢哋屋企住，已经系家人嚟，但当伴侣走咗之后，关系可以咁快转变，我就想写呢个故事。」而故事以女同志为背景，Ray解释讲座的个案全是女性外，还因香港社会较保守，女同志较男同志情侣更易融入对方家庭，「但个接受其实有几深呢？！表面上比男同志容易啲，原来当有事发生，有啲磨擦，啲嘢就会发晒出嚟！」

71岁的嘉雯姐直言永不言休，「我怀自己有过度活跃，坐唔定！」

嘉雯姐开心Ray再邀合作，「呢个年纪嘅演员，好难遇到有发挥角色。」

《叔·叔》上映时撞正疫情，Ray希望观众今次可多到戏院支持。

靠姜大卫帮手搵李琳琳

Ray跟嘉雯姐合作《叔·叔》后变熟络，加上写剧本时是《叔·叔》宣传期，看到嘉雯姐跟女主角「Angie」很相似，就依着对方来写，「嘉雯其实同《叔叔》演好师奶嘅『阿清』好唔同，佢本身好elegant，气质同『Angie』有啲相似，外表睇好温柔，其实裹面好硬净、坚强，我就将呢样嘢混合咗角色。」

全靠John哥帮手，导演才能搵到琳琳姐复出。

李琳琳演的女同志「Pat」一角，Ray之前试镜一直都未搵到适合演员，「呢个年纪演紧戏嘅女演员唔多，好多喺TVB做紧，电视剧会好深入民心阿妈形象，我唔想，想有清新啲感觉。」他从旧电视剧中寻找，看到李琳琳在《轮流转》的演出留下深刻印象，「《轮流转》讲5个女仔，李琳琳角色冇特别讲拍拖，系现代新女性，好得意好清新，有个好modern嘅感觉，再睇《民间传奇-梁山伯与祝英台》做男仔都OK，都几俊俏喎！几吸引！」Ray最终透过姜大卫（John哥）相约李琳琳见面，初次见面他已觉得对方好Fit角色，「佢真人好爽，都倾得几好，问佢有冇兴趣就畀个剧本佢睇，过咗几日，佢已经话有兴趣做，佢同我讲啱啱拍完美剧，都有返兴趣拍戏。」姜大卫受访时曾说，以往都有人搵过李琳琳复出，只是角色剧本未能打动她，Ray亦承认《从今以后》角色吸引到对方，「有自己性格有自己故事，唔系一个附属品嘅角色，所以佢会有兴趣。」

琳琳姐（后左一）在1980年TVB剧《轮流转》的演出吸引导演。

琳琳姐（左）在1977年TVB剧《梁山伯与祝英台》中演「祝英台」，导演赞靓仔。

靠工作坊培养伴侣默契

初次跟75岁琳琳姐合作的71岁嘉雯姐，在Ray安排下首见面，已好快搵到话题，「我哋年纪差几年，都系同代嘅人，原来佢喺德望读过书，我喺德望毕业，好得意。」另外导演再安排演员上workshop，令大家加快熟络，对演绎相处超过40年的伴侣有很大帮助，「讲真我哋事前又唔识，要做到咁好难，唔通我搬去John哥度住一排咩？！冇可能，哈哈！做咗呢啲workshop，大家有个心意沟通，唔系好多戏可以容许咁嘅交流，所以我好锺意做Ray啲戏，哈哈！」到正式埋位，嘉雯姐觉得对方演技完全冇生疏，「好似学踩单车一样，学过永远都喺度，不过要少少时间热身，哈哈！」Ray又搞笑补充，「佢丈夫仲做紧戏嘛，两个可能喺屋企练咗好耐！嗰几十年日日练啦！哈哈！」

嘉雯姐饰演的「Angie」，因处理同性伴侣遗产而跟对方家人决裂。

嘉雯姐和琳琳姐演同性伴侣「Angie」和「Pat」，初相识但拍摄出嚟似相处逾40年。

嘉雯姐讲到难忘戏份，就是跟琳琳姐唯一的亲热戏，她更献出跟女性咀嘴的第一次，「琳琳姐做主动，当然我觉得系好nature，唔系因为我唔敢，我唔主动，系因为喺呢个关系里面佢系重心，主动性强好多，于是好自然就发生咗。」这场戏另一难忘点是天公不造美，「拍嘅时候多灾多难，剧本预系风和日丽一齐行山，好浪漫仲有人吹笛，点知嗰日落大雨，唯有转去个亭度拍。」

「Angie」跟「Pat」的家人本来相处融洽。

《星岛申诉王》推出全新项目「我要赞佢」栏目，现诚邀市民投稿赞扬身边好人好事，共建更有爱社区。立即「我要赞佢」︰https://bit.ly/3uJ3yyF

 

想睇更多精彩内容，请立即浏览「区区有申诉」活动专页，https://bit.ly/41hgS9E

 

《星岛头条》新网站有更多精彩内容：http://www.stheadline.com/