谈善言骆振伟激赞AK超投入：拍争女戏用真力兴奋剧透《打天下2》感情瓜葛丨独家

2024-04-18 07:00

谈善言和骆振伟（Thor）首合作ViuTV新剧《打天下2》，延续「庄惠」一角的前者于拍摄初期已受伤，韧带半月板撕裂要停工大半年休养，更因影响拍摄进度非常自责。另外，今季Thor演的二世祖新角色「Darwin」，会跟AK演的「志浩」争夺「庄惠」，Thor更唔觉意泄漏剧情，两男为争女大打出手，AK更因太投入角色玩真力𠻹！采访：杜杜摄影：谭志光发型:Larry Ho@Aveda IL COLPO(阿谈) 化妆:German Cheung(阿谈) 服装:MAX&Co.(阿谈)、MELSIGN、432hz(Thor)

阿谈和Thor希望再合作，但后者就呻，「我单方面有啲攰，希望下次以另一个身份喺佢身边出现。」

阿谈欣赏Thor工作态度认真，首合作已好快熟络，「佢做主持多，但喺现场有好多谂法，我都好surprise。」Thor表示一直恨跟阿谈拍戏，「听过佢好多嘢，渴望同佢合作，佢好有谂法，好认真，好enjoy对戏过程，佢好从容又好有direction，又接受你个direction，好开心咁玩每场戏。」被Thor狂赞的阿谈连忙道谢。

Thor饰演新角色「Darwin」，是个醉心MMA的二世祖。

剧中Thor演阿谈老板。

「庄惠」今季将会不断面对各种逆境。

太攰影响状态出事

阿谈今季对打次数不及上季，但都属大场面，包括她受伤的一幕，「嗰场大打戏棠哥（欧锦棠）一直好期待，牵涉好多嘢，一shot落又封晒路拍，我哋排好多次都冇事，roll机第一take就濑嘢。」她怀疑太攰不在状态出事，「嗰日收工过嚟直踩，动作要来回，呢边打一次再转身，再起跳嘅时候，身转脚未转，就扯断咗。」由于开拍1个月属制作初期，受伤令她份外自责，「我大部份戏都未拍，嗰场又未拍完，book晒伊馆拍最尾ending，搵咗日本演员过嚟打，我伤咗所有嘢都要停拍，好担心。」之后制作组先跳拍其他戏份，等她休息大半年再续拍，「再book多次伊馆，再请武田（梨奈）过嚟同我对打，好彩日本演员又就到。」她笑言再拍时除了搵替身帮手，大家都好锡住她，「我唔避佢哋都会避，佢哋好惊我再整亲，我想郁佢哋都叫唔好。」

阿谈自认受伤后太懒做物理治疗，也担心会有后遗症。

阿谈受伤后要即时做手术，出席活动都要撑拐杖。

拍打MMA戏难度好高

Thor饰演新角色「Darwin」，他形容是个醉心MMA，有理想的二世祖。继《绳角》后再拍打戏，他称两者分别好大，「上次打classic boxing，今次就MMA，完全两样嘢，locking嗰啲我哋完全唔识，所以上次喺《绳角》学到嘅嘢完全冇关系。」他又庆幸今次再跟AK合作，因拍打戏默契好紧要，「靠大家嘅trust ，好彩我同AK打嘅途中唔系好多出错，AK就无敌，佢练舞记step，主要系我嘅问题，好彩压力驱使下还好，所有长镜头都系两、三take，棠哥知道我哋去尽咗都收货。」阿谈大赞两人拍擂台戏一shot落好厉害，「肢体协调同记性都要好好。」

剧中Thor和AK为阿谈大打出手，首次打MMA难度高。

Thor最难忘跟著名武指元宝的对打戏，「好惊，好大压力，好有趣经历，可以同咁强劲嘅武指对打。」

Thor拍完《绳角》不足半年再拍此剧，悭返操肌时间。

事隔3年再演绎「庄惠」，阿谈称感觉不同，因今次要面对不同逆境，「再接触返『庄惠』，佢真系唔讨好，哈哈！有啲人嘅坚持会觉得好烦，但系又唔会想唔理佢，我就捉住佢对理想嘅坚持，一路做落去。」她又欣慰有班好伙伴，「庆幸着返件袍，纸皮道场嘅伙伴可以帮我recall返『庄惠』出嚟，港队对手亦帮我投入返角色。」

阿谈承认对「庄惠」又爱又恨，笑言有时都觉得角色「好烦」。

阿谈再跟欧锦棠合作，戏中的师徒情令她好感动。

阿谈赞再合作的AK更成熟踏实，「不断想可以点样做得更好。」

Thor妒忌又羡慕AK

上季AK演的「关志浩」对「庄惠」一往情深，告白被拒都冇放弃，追问今季两人关系？Thor反应好大：「哎吔！我唔听嘞！哈哈！」轻轻剧透的阿谈说：「『志浩』系长情嘅人。」而Thor否认是第3者，但就爆料：「Food Buddies罗！哈哈！唔系，有啲瓜葛罗！不过系单方面！」阿谈代「庄惠」向「志浩」大派定心丸，「庄惠都几一意孤行，目标清晰。」「Darwin」条件咁好，会否令「庄惠」心动？阿谈就答得好妙，「「庄惠」唔睇呢啲嘢，佢净系得空手道。」问「Darwin」和情敌「志浩」关系？Thor不离搞笑本色，「单方面嘅憎恨，妒忌、羡慕、中年危机、多疑。」仲自爆两男为女大打出手，「同佢（AK）嗰场大打有啲机缘巧合，未关呢个人（阿谈）事，纯粹武术上砌磋，拍其他反而瘀晒，我觉得AK加咗真力，哈哈！（投入咗角色感情？）系罗！因为你（阿谈）呀！嗰度几多石仔，我哋碌嚟碌去。」