体育精灵｜台湾啦啦队员 人气劲搵真银 林襄李多慧转会身价更高
2024-03-31 18:30 
香港金牛篮球队，最近搞咗个「金牛啦啦队选拔赛」，已经诞生15位Bull Girls。香港球队一向唔注重呢方面marketing，落后其他地方一大截，希望金牛Bull Girls做得起个势，迟到好过冇到。
好似台湾，啦啦队文化非常成熟，甚至国际知名，好多女仔视为梦幻职业，因为系转战娱乐圈最佳跳板。当中以职业棒球队的啦啦队最出色。乐天桃猿旗下「乐天女孩」（Rakuten Girls）更加吸粉无数，林襄、李多慧、珺珺、琳妲等，都拥有大量粉丝，连带收入亦相当可观。
上年年底，台湾有个「十大人气中华职棒啦啦队员」调查，第1名系众望所归嘅林襄，2至10名顺序李多慧、珺珺、琳妲、陈伊、孟洁、巫以萱、陈怡睿 Yuri、篮篮、慈妹。佢哋知名度比好多艺人更高，每月都会有唔少商演机会，反而上综艺节目，通告费通常好少，但就可以增加曝光率同知名度。
台湾10大人气啦啦队员
咁究竟呢批啦啦队，收入有几多呢？一位拥有丰富资历嘅台湾啦啦队经理人豆芽（林裕庭），近期喺一个网上节目爆料，现时一般啦啦队员年薪，至少超过50万台币（约13万港元）。
我哋睇落好似好少，但要知道，台湾年轻人起薪点非常低，呢个月薪对一般后生女唔算低，而且有机会出名，搏长线有搵钱。
当然，打入10大人气榜嗰批，已经系红人，大把job接，随时1个月都唔止50万台币。同节目主节人亦话，几次见到啦啦队女孩揸嘅车，仲贵过球员座驾，你都咪话唔巴闭。
最近台湾啦啦队界有大新闻，被外界视死对头嘅林襄、李多慧，近期遭到挖角，先后离开乐天女孩，转投味全龙。由于消息哄动，新闻炒得劲热，两女神转会除提高喇喇队员收入，地位进一步提升，财源亦自然滚呀滚、滚呀滚……
----
《星岛申诉王》推出全新项目「区区有申诉」，并增设「我要赞佢」栏目，现诚邀市民投稿赞扬身边好人好事，共建更有爱社区。立即「我要赞佢」︰https://bit.ly/3uJ3yyF
《星岛头条》APP经已推出最新版本，请立即更新，浏览更精彩内容：https://bit.ly/3yLrgYZ
最新回应