《路基完》恭喜宋仲基终于识做戏丨头条戏场

2024-03-15 06:00

电影改编长篇小说，讲述宋仲基饰演的「脱北者」路基完为生存，到比利时申请难民资格，期间遇到因家庭问题出走，自暴自弃的韩裔靓女玛丽(崔成恩饰)，惨情加爱情加欧洲景色应该好易攞高分，奈何节奏太慢，片长2小时13分钟，体感4个钟，中间打咗好多铺机都冇影响理解，故事弱，兜嚟兜去都未到终点，最后决定当爱情片嚟睇，舒服哂。(已上架) 撰文:廖思慧相片提供:NETFLIX

已上架

初到比利时，基仔被严重欺凌，好多人嫌佢污糟邋遢都咁靓仔，真系无辜。

利申，本人唔系宋仲基迷，但佢每套作品咁啱都有捧场，韩剧《黑道律师文森佐》同《财阀家的小儿子》都非常好睇，但基仔一张娃娃脸实在碍事，奸唔到，老谋深算又唔够，最惨爆发力极弱，简单咁讲，即系啲戏麻麻。

基仔本来获北韩同胞做证，但被背叛，内心戏做得好好。

热烈欢迎宋仲基演员
睇《路基完》宣传访问，原来7年前，宋仲基曾拒绝接拍此片，7年时间，佢经历闪电结婚及离婚，被Fans狂闹，广告商嫌弃，再婚及做爸爸，人生阅历丰富咗，演阴功脱北者即刻好有Feel，兜咁大个弯都系想赞基仔做戏好咗，真心恭喜。电影前半段是基仔的个人表演，睇住阿妈死，然后带住遗憾远走高飞，言语不通又人生路不熟，俾人欺凌、执垃圾食仲要瞓公厕，基仔演绎可怜虫好到肉，跟同样脱北的冻肉公司女同胞相处最好睇，特别带出「无论世界有几地狱都要努力活下去」的理念，共勉之。