57岁葛民辉未Out过自揭瓣瓣掂秘诀 爆笑啄住丽英唔放疑惑搵童工丨独家

57岁葛民辉跟锺雪莹、邓丽英和潘宗孝（ERN9）在电影《填词L》首度合作，电影讲追梦，众人现实亦曾为追梦做过唔同工作，分别有卖演唱会周边、做补习Miss等；而由细到大冇明确目标的阿葛，全靠冇畀自己框框乜都做，结果DJ、室内设计及时装都做得有声有色。采访：杜杜 摄影：朱伟彦 发型:Ruth Lam(锺雪莹)、Oscar Ngan(丽英) 化妆:Cathy Zhang(锺雪莹)、Deep Choi&Eva Chan(丽英) 服装:MAX&Co.(丽英)

锺雪、阿葛、丽英和ERN9拍摄时未有太多机会相处，宣传才令他们变熟络不停讲笑。

阿葛不论讲自身经历或是品评一班后生，一贯风趣幽默。

锺雪开心首度跟阿葛合作，「父女」关系亦相当不错。

锺雪由2019年起以笔名「锺说」填词，合作歌手有洪嘉豪。

锺雪凭电影除提名香港金像奖最佳女主角，早前亦获金马奖提名。

戏中阿葛演锺雪及ERN9的爸爸，由于故事根据导演黄绮琳的真实经历改编，即阿葛就是黄绮琳的父亲，阿葛笑言当初获导演邀请时反应好大，「佢觉得我好似佢老窦，我话睬！哈哈！佢话性格好似，叫我试吓帮佢就好快应承，送佢一程，横掂你咁锺意投资电影咯，撑你落埋去啦！」讲到首次合作的一众后辈，阿葛发挥幽默本色，「佢哋都好专业，好快入手，听得多新演员做访问，原来都系老鬼嚟，ERN9已拖几条友剪埋片拍嘢上平台，即系成个电视啦。呢个丽英由小学开始已经唱「Sailor Moon」（美少女战士），唱咗几10年歌。阿女（锺雪）原来又系老鸡嚟，又驱风又盛。」阿葛跟戏中演ERN9女友的丽英冇对手戏，到谢票才知有个「新抱仔」，「趁我返乡下嗒咗我个仔！」

戏中阿葛演ERN9和锺雪两兄妹的爸爸。

阿葛戏中演默默支持个女追梦的好爸爸。

剧中锺雪撞破阿哥（ERN9）同丽英亲密关系。

兴奋跟儿时偶像合作

三位后辈自细已听过阿葛大名，经接触后，锺雪对「爸爸」更尊敬，「佢好认真、谨慎，好乐于畀意见，现场见黄绮琳有啲甩漏，就会摄吓摄吓埋去一齐倾。」阿葛搞笑回应：「我提佢咩？放饭嗰啲呀？哈哈！」再解释知道监制黄鐦和导演自资很难，「喺真住宅拍，唔可以over超晒资，有时阿鐦同导演好似魂游慢咗，系咪有啲嘢唔通或者唔方便同我讲？我就忍唔住埋去撩吓。」ERN9的日本时装界朋友也视阿葛为偶像，心情自然复杂，「兴奋但系又要压制住，唔可以fans上身，签名嗰啲摆到最后。」丽英虽跟阿葛冇对手戏，幸好谢票补数，「嫁咗咁耐都见唔到面，哈哈！」 阿葛笑言，「谢票觉得佢好活泼，唔知佢系边个，矮得得，点解搵童工呢？！好似未成年，我个仔会唔会打藤㗎？！」

丽英和ERN9在戏中首次合演情侣。

阿葛忽然多咗个「新抱仔」丽英，相当多意见发表，笑死！

锺雪画韩星周边产品搵钱

电影以做填词人追梦为主题，锺雪自爆戏中整演唱会周边产品赚外快，是她的亲身经历，「黄绮琳问我有冇嘢贡献吓，我话升大学时，整过演唱会周边产品，嗰时好兴《MAMA》啲韩星。」葛爸话：「梗系啦！唔使畀版权㗎嘛！」锺雪解释：「我哋自己画㗎！」ERN9于疫情时在日本生活3年，为媒体拍旅游片，「拍搵钱片好少时间拍自己想做嘅嘢，日本经济狂跌，嗰时28岁返香港由头嚟过，目标一年后有稳定经济做返锺意嘅幕前，结果由《试当真》幕后变幕前，两个目标都完成咗。」丽英就考了几次演艺学院都不成功，令她很迷失，「我用排除法，老咗想做咩？除咗表演、唱歌同做戏，完全谂唔到乜嘢系好想做。」结果她靠其他工作支撑追梦，「帮人补习，再返啲workshop，好彩入咗《小薯茄》。」

锺雪和丽英在戏中卖演唱会周边产品，原来取材自锺雪经历。

ERN9在日本3年靠拍旅游片，支持自己追梦。

一心想做歌手的丽英，去年终举行首个演唱会圆梦。

阿葛从冇谂过做到DJ

阿葛直言自细冇特别梦想，做DJ都是机缘巧合，因当年要有把靓声才有资格做，「鸡仔声咁『B呢巴啦』，又有懒音，唔会觉得自己入呢行。」从名校华仁毕业后，盲桩桩去读设计，「会考唔系机关枪（F）就担梯（H），得中英数同地理合格，冇谂过读预科，攞完成绩，同学想读理工fashion，佢话去隔篱街面试，有间明爱成人教育中心好易收，我见近就跟咗条友去咗白英泥（明爱白英奇专业学校）。」阿葛选读广告设计因哥哥亦做这行，「尝试理解广告设计系咩？但见佢通宵达旦，又要招呼客happy hour饮啤酒，唔似睇电视、电影林子祥嗰啲好劲。」当他发现广告设计非如想像，决定再搵出路，「喺白英泥读咗1年，第2年林海峰继续，我好快转咗做时装。」他又寄语年轻人不要为未来设限，「我读广告，但出嚟变咗做display，点解要读完先做得嗰行？！就算室内设计做装修，我冇做过㗎，又冇读过时装，好多唔需要读，好似我冇读过电台训练班都可以做喎！谂个方法去做嗰件事罗，think out of the box。」

阿葛跟林海峰组成「软硬天师」，由DJ变组合，更多次开骚。

阿葛搞时装多时，早已成立个人品牌「4A like Black」 。

《星岛申诉王》已推出全新项目「区区有申诉」，并增设「我要赞佢」栏目，现诚邀市民投稿赞扬身边好人好事，共建更有爱社区。立即「我要赞佢」︰ https://bit.ly/3uJ3yyF

想睇更多精彩内容，请立即浏览「区区有申诉」活动专页，https://bit.ly/41hgS9E

 

《星岛头条》新网站有更多精彩内容：http://www.stheadline.com/