何沛珈演争仔戏Cut机揽住刘佩玥喊绯闻男友阮浩棕提早5小时到场服侍丨独家

2024-03-04 07:00

TVB「胸猛小花」何沛珈（Roxanne）凭索爆身材成为焦点，自前年参加《香港小姐再竞选》夺冠后曝光率大增，再于《新闻女王》中被性侵，两分半钟含泪独白戏，睇到观众心都痛赢尽好评。成功弹起的Roxanne获监制王心慰重用，在新剧《非份之罪》单元「恐怖情人」中孭重飞，孖住力捧姐仔刘佩玥(Moon)演出。日前两人拍摄一场争执戏，戏内爆Seed演绎，戏外喊到收唔到声，Roxanne绯闻男友阮浩棕更全程照顾周到，暖男认证。采访：方骞平摄影：邓国良

刘佩玥带住27岁何沛珈拍新剧孭重飞，更狂赞后者冇得顶。

何沛珈喊住哀求Moon放人。

当晚刘佩玥及何沛珈于火炭一所工厂大厦拍外景，剧情讲述这对好姊妹因为阮浩棕嘅感情瓜葛发生争执，两人先口角继而只揪。虽然头段未有阮浩棕戏份，但他以睇位为理由，提前5小时到场照顾绯闻女友Roxanne，递水、递纸巾外，又会帮手望吓个pad垫得好唔好，担心女友拍动作戏会受伤，超细心。

绯闻男友阮浩棕好关心Roxanne。

阮浩棕无啦啦被闹

由于系重头动作戏，现场由武指指导两人走位、推撞等动作，排咗几次两人就埋位自动波。镜头前Roxanne喊住哀求Moon让爱，Moon超投入喊到声嘶力竭，爆喊拒绝，两人演得七情上面，相当入戏，投入到cut机后仍然喊到收唔到声，要揽到实嚎哭1分钟先平静到情绪。喊到饱嘅Roxanne深呼吸一下，又喊又笑向在旁「暖男男友」发泄，怒斥：「臭男人好坏，男人真系信唔过！」无啦啦捱轰的阮浩棕，一脸尴尬为自己打圆场：「剧情需要、剧情需要…」

两人Cut机后仍揽住喊到收唔到声，阮浩棕唔敢讲嘢。

瞓身肉搏好似真打

最后因为讲唔掂数，两女大打出手，Moon为求脱身大力将Roxanne推开，后者跌落纸箱火速爬起身追住Moon，然后全速扑向Moon后腿，被拖后脚的阿Moon就大大力用脚撑开Roxanne，两人喺地下拉扯肉搏，非常肉紧，连剧组都忍唔住讲两句：「哗！睇佢哋几狠呀！所以唔好得罪女人。」虽然只系短短几分钟镜头，但因为要试位，演员又要加保护垫，加上拍唔同角度，足足搞咗成晚才大功告成，Roxanne喺阿Moon带领下发挥到超水准演技。去年「马来西亚最喜爱TVB女主角」刘佩玥睇好Roxanne「up and coming」：「佢工作态度好好，最重要会感恩。」

Moon大力将Roxanne推向纸箱。

Moon因为太投入，戏外都系咁喊。

两人瞓身喺地上拉扯肉搏。

跑马拉松keep身形

已习惯捱打的阿Moon笑言公司知她捱得兼抵打，所以呢几年拍咗唔少动作戏，包括《城寨英雄》、《隐形战队》等，由一开始手脚唔协调，到𠵱家有少少进步。问到瞓身为公司搏到尽，系咪迈向视后必备元素？Moon强调做人好简单，入行10年都只求今日好过昨日，做好自己，每一日过得开开心心。阮浩棕补充话：「演员唔系为奖而做好角色，最重要观众睇到有表现。」对于fit爆身形成为焦点，Roxanne说：「咁我跑开马拉松，所以keep到身形。」她最庆幸由《宠爱Pet Pet》演开心护士；到《新闻女王》被性侵嘅坚强排球队队长，观众终于睇到她另一面。Moon再劲赞Roxanne：「佢真系好索㗎！𠵱家我哋再熟络啲，睇到佢努力及勤力一面，佢仲好有心做主持，真系冇得顶。」