顾定轩被误会唔再演戏成年冇收入想自己话事自资几十万做音乐丨独家

2024-02-21 08:00

前年进军乐坛的顾定轩(Zeno)，今年会继续自资出歌，新歌《罗曼蒂克》MV亦在情人节推出，Zeno坦言做独立歌手，条路好难行，除出钱出力，仲要绞尽脑汁做音乐甚至创作文案，搞到佢经常头痛要常啪止痛药，所以新年愿望最想身体健康，唔想冇钱之馀仲要身子弱！采访：方骞平

属狗的Zeno唔在意今年犯太岁。

顾定轩喺新正头到黄大仙拜神祈福。

Zeno诚心祈求身体健康。

顾定轩于新正头到黄大仙拜神祈福，希望新一年身体唔好咁瘦弱，可能畀自己压力太大，去年开show前身体负荷唔到，导致肠胃炎肚屙兼失声，搞到朋友们担心多过enjoy个show。对于属狗的他今年犯太岁，Zeno就唔多在意：「肖狗好似年年都犯太岁，其实系咪都要咁过生活㗎啦，相信努力做人乐观啲，有好嘅心态自然会开心啲。」

去年Zeno做Show前身体不适。

花几十万做音乐好有诚意

Zeno今年仍然会自资做歌，仲会筹备出实体唱片及精品：「呢两年出新歌、实体唱片及精品、做show，夹夹埋埋花咗几十万，可想而知我几咁锺意音乐呀，同睇得到我嘅诚意。因为自己公司做音乐自由度大，可以直接表达想讲讯息，作品有血有肉听到自己心声，反而拍戏系工具，满足感冇音乐咁大。」不过，做独立歌手唔容易，Zeno只能在有限资源下尽做，「相反拍戏有钱收，最惨啲人误会我埋头苦干做歌手之后唔再演戏，近期真系少咗好多拍戏机会令我好头痛，记得第一年做歌时因为冇乜收入，试过做西饼搵外快，自己做厨出身，唔会有演员光环。」