星8卦｜「浪子」逢女都上买公仔沟掂「女DJ」成笑柄

2023-12-05 11:30

大家一直唔多明「大婆」点解肯同渣男「浪子」一齐，仲要系咁帮佢做好事，制造好男人形象。「浪子」渣嘅程度简直世纪无双，去到边总会同唔同嘅女人搞上。有次出外景仲俾女主角发现佢偷睇自己换衫，立刻同同组嘅「大佬」投诉，两个男人几乎大打出手。因为「大佬」呢几年收埋咗佢做小三，你装我条女，肯定死硬！

「浪子」就算拍个节目，都可以同啲临记搞埋，只要条女清秀又高瘦就可以一齐返屋企开心吓，对女方嚟讲，你咁红睇上自己，仲唔系机会来了？唔落叠就走宝。最经典系沟「女DJ」，每次出门都会打电话报告行踪，「女DJ」好自然认为自己系唯一一个，觉得男人咁认真对待呢段关系，只不过对方有老婆啫，但人哋咁真心，自己都好珍惜，完全唔认为自己系第三者。而「浪子」好识捉女人心理，知道呢个追求浪漫，所以去到边都会买个毛公仔送畀佢，而且一个系列咁送，「女DJ」点会唔心动呀，你咁忙仲记得买公仔，仲去搵齐整个系列，次次收到都感动到喊！

对「浪子」嚟讲咁样沟女悭水又悭力，全部叫助手每个站都买定手信方便自己扮深情，当然话自己出去搵，对纯情女仔呢招特别入心入肺，「女DJ」咁多年都将呢件事挂喺嘴边，一来畀人知自己有红人追，二来又抬举「浪子」浪漫，其实两个都唔要面，俾人笑到面黄。