星8卦｜苦恋无结果「女主角」出狠招激到「高层」入医院

2023-12-01 11:30

「女主角」同「高层」一直苦恋多年，最近嘅结局都几令人唏嘘。话说「女主角」做𡃁妹时，因为单亲所以对年纪大嘅男人一直有好感。「高层」嗰阵已经好有江湖地位，「女主角」同「马骝」分手之后就同「高层」有暧昧，虽然佢成日发小姐脾气，但只要「高层」出面𠱁番吓佢又会乖乖返娘家做嘢，最紧要系「女主角」真系旺场，铺铺都可以挽回声势。

可惜喺等到「高层」同前妻搞清关系，「高层」反而向往呢种无人管嘅自由，「女主角」叫佢公开关系又唔肯，等足咁多年女人自然心淡，但最绝系「女主角」竟然同咗「高层」其中一个沙煲兄弟一齐，仲好快公开男女朋友身份，人前人后表现恩爱，搞到「高层」有苦自己知，最近仲郁到入埋医院，医生话佢呢个病系因为有太多心事，影响情绪。

「女主角」其实系好锺意「高层」，但另一方面亦希望有个身份，虽然沙煲兄弟都畀唔到名份，但就锡到天上嘅公主咁，绝对唔会令「女主角」感到委屈。最近「高层」终于再带女人喺身边，奇在呢位新欢每个角度都同「女主角」有八分相似，证明「高层」对「女主角」念念不忘，最惨系做咗兄弟条女，无得返转头，惟有搵个替代品顶吓罗！