独家丨黎彼得经济拮据靠自己唔搵巨星帮手 笑谈陈年做节目秘史撮合学友罗美薇
2023-11-14 07:00 
73岁绿叶演员兼填词人黎彼得（Peter哥）去年入院「通波仔」后停工，幸获富商刘銮雄主动资助手术费及每月生活费，加上契仔黄宗泽等人出手相助渡过难关。不过近月大刘已暂停生活费补助，Peter哥形容得返半杯水要悭住饮。虽然入行超过50年有唔少红星朋友，但他强调：「有啲骨气，咪旨意人哋会帮你！」他又大爆做电台节目的陈年秘史，及跟红星的渊源，原来张学友同罗美薇结婚同佢有关。 采访：方骞平 摄影：邓国良
「鬼才填词人」黎彼得是第一代清谈节目主持人，80年代曾主持极受欢迎的商台夜间节目《豪情夜话》，唔少红星会慕名而来倾心事，更成为宣传圣地，因而跟大缆都扯唔埋的发哥、刘嘉玲及张学友等成为老友，他更自爆当年有好多女仔向他示好：「有啲𠵱家系红星，仲系港姐嚟，哈！唔系点可以埋到我身，但我唔会攞人着数。」
张学友黄沾曾交恶
往事只能回味，Peter哥称做电台节目有好多搞笑嘢，「黄子华上节目畅谈扮死尸经历；阿Sam就带埋结他齐齐唱歌；发哥会叫大堆外卖，边食嘢边倾偈；有次黄百鸣做完午夜场宣传，带咗《开心少女组》袁洁莹、罗美薇、陈加玲嚟直播室，咁啱张学友在场，佢同MayMay就初相识，当晚学友提出车埋MayMay返屋企，女方当年仲系𡃁妹仔，学友九成睇中佢啦，之后佢哋先一齐拍电影《痴心的我》。」Peter哥讲到停唔到，称多年后学友做音乐剧《雪狼湖》时，他跟MayMay仲多谢佢，「『两只嘢』喺后台揽实我话，冇我，佢哋唔会结到婚，我系佢哋哎吔媒人喎！（咁有冇畀媒人利是？）冇。 」又提到1984年学友获得《十八区业馀歌唱大赛》冠军，Peter哥任总评判，「佢唱得最好，我谂佢多少有啲感恩，所以我喺商台后期患急性肝炎，佢带埋果篮独自嚟探病。」Peter哥又爆因为广告费问题，学友曾跟前辈黄沾闹交，搞到两人面左左，黄沾嬲到唔再用佢，最后由他帮手拆返掂。
同许冠杰不相往来
讲到跟「三朵金花」刘嘉玲、吴君如、曾华倩的情义，Peter哥最深刻：「几条友成日嚟我屋企，一倾就通宵，初入行嘅嘉玲唔识讲广东话，我教佢用录音机录起读报纸，佢好感性，对我好好，不过，𠵱家绝对冇联络，佢哋有佢哋行嘅路点会搵我呢？人到咁上下自动会换一班朋友，好似黄子华咁都唔会搵我啦，人去茶凉唔会记得，人生就要睇开啲，正如我同许冠杰生死不相往来，真相永远不便讲。不过呢行真系有好多神话，当年我同成龙饮过咖啡倾车，佢叫我买法拉利，哈！当年我揸Ben跑㗎，但俱往矣唔使谂。」而他最欣赏黄宗泽有情有义。
启发人生无求最好
Peter哥坦言目前冇工开，除有些少定期，流动资金唔多，但每月要为34岁独子找卡数，连埋供佢内地读中医及自己嘅生活、医药费，最少开支5万多元：「系旁徨嘅，自己唔食个仔都要食，鬼叫自己生个咁嘅仔都冇办法，就算佢知我苦况都唔会睬你啦。」73年的人生经历亦启发他：「人无远虑，必有近忧，思想不妨消极，但行动就要积极，原来人生冇灾冇难冇拖冇欠冇儿冇女，无求系最好。」
Peter哥冇电影运，亦自知喺呢行甚么都不是，94年离婚后卖楼决心转行做生意，「荷叶凝珠，不及东风一浪」致投资失利。问到经济拮据会否向红星朋友求助？他即说嘥气：「上山寻虎易，出门靠人难。识解冇？」还强调各有前因莫羡人：「求人不如求己，有啲骨气，咪旨意人哋会帮你，依赖他人永远冇用，废物！」
《星岛头条》APP经已推出最新版本，请立即更新，浏览更精彩内容：https://bit.ly/3yLrgYZ
最新回应