专栏｜岂能尽如人意 但求支持爱队

刚刚过去星期一热刺对车路士，蓝战士最终在11打9嘅情况下，凭着尼古拉斯积逊帽子戏法以4:1胜出伦敦打吡。赛后好多人探讨紧热刺嘅高位防线，而我更想探讨一下球迷嘅心态。

事后球迷反应两极，包括我在内都认为车路士表现相当之曳，有一种莫名嘅愤怒，理论上11打9应该系非常之轻松，一早可以锁定胜局，但把握力欠奉，有大量必入机会嘅决定都好差。大量香港留言板、讨论区一致认为车仔虽然赢波，但比赛发挥非常之差，领先2:1时更加要按爆平安钟。

明白好多球迷都会不满，心谂连对9人嘅热刺都咁辛苦，应该要一早大炒对手，担心对曼城会好大镬，今季战绩都唔会好得去边。不过，我睇到外国球迷嘅社交媒体，则大事庆祝，唱着球会会歌，赞颂着球员的表现。或许你可以话佢哋短视，其实车路士𠵱家嘅排名赢到榜首嘅热刺，加上一场伦敦打吡，真系非常之困难，更何况每一场波都系重新计算，好多球迷都无谂过利物浦逼和卢顿啦。

每一场波都真系唔同，不停谂咁多，抱怨咁多，倒不如自己爱队赢波时好好庆祝一下。Willhappy

-----

《星岛头条》APP经已推出最新版本，请立即更新，浏览更精彩内容：https://bit.ly/3yLrgYZ