专访｜「御用师奶」黄梓玮读淘宝大学学直播再转战抖音搵真银 强攻大湾区公开博主掘金秘诀
直播带货近年相当盛行，一众人气高的TVB一线花旦、小生都纷纷加入直播主行列。但人气又是否跟直播销售额成正比呢？入行逾20年的无綫资深演员、有「御用师奶」之称黄梓玮，近年亦加入直播带货行列。
她接受《星岛头条》访问时表示自己由入读淘宝大学学直播，其后转战抖音，现时更拥有固定粉丝，日日追睇其直播。黄梓玮坦言人生因此出现转变：「冇谂过㗎，只系因为一个疫情，而令好多人生活方式都有转变，任何一样嘢都想试，呢个算系自己宣传自己方式，都可以算系一个新出路。」
点击睇黄梓玮入行逾20年经历：
访问当日在黄梓玮主理的《港真靓货》直播间内进行，虽然直播室面积不算太大，不过五脏俱全，内里有各种各样的销售货品，写字枱上摆了多部大电视，电视附近装有直播所需的各种工具，直播用的打灯泡，一部又一部的手提电话，黄梓玮两、三下动作，很快开机与网民进行直播，话题包括日常生活的轶事，笑声此起彼落，感觉温馨。
黄梓玮坦言当日在无心插柳的情况下，加入了直播带货行列，她说：「大约系2020、21年左右，嗰阵因为疫情，又唔可以出街，如果唔使返TVB，咁都要搵啲嘢做，咁啱嗰阵有个叫淘宝大学嘅主播课程，我唔知原来做主播都要读书，所以咪去试吓。」
黄梓玮还说：「其实喺内地直播带货呢样嘢已经有咗好耐，淘宝佢哋真系搵埋导师，有埋证书，最初系喺线上返学，最后嗰一堂就连埋考试一齐做。毕业之后仲有一张证书，之后咪开始喺淘宝实习，学点样做直播带货。」其后因为抖音的掘起；在协会的安排下，黄梓玮在抖音试播，成功通过测验后，她便成为「港真靓货」的台柱，同时亦开设了自家频道，黄梓玮说：「初初学嗰阵唔止净系幕前，后台都要自己控制，好似几时派福袋红包，仲有点样排品，全部系一脚踢自己做，但系好少人喺淘宝睇直播买嘢，想买嗰样嘢咪直接点入去买，反而抖音嘅人系锺意睇住直播去买，流量同成交都快，做抖音就好好多，排品，弹幕都有小助理做。我主力系香港艺人站，由零开始，拍片sell吓自己放上去推流，粉丝储够一定数目就开播，系一个一个粉丝咁储返嚟。」
直击黄梓玮带货直播现场：
直播带货推流要靠成交量
黄梓玮亦分享了小秘诀：「因为抖音系AI控制，如果佢认定你系娱乐播，唱吓歌同倾偈，佢净系会派睇娱乐播嘅粉丝畀你，但系如果你做娱乐播又挂个小黄车做带货，佢就会拨咗你去卖货嗰边，但系卖货系点样推流呢？就系计你有冇成交，譬如喺15分钟内冇成交，佢个流就唔推，但系如果有成交，佢个流就会double咁推啲粉丝入嚟，同埋分数都会影响个推流。」
收入方面，黄梓玮坦言：「学嘢就喺淘宝，但真系搵到钱就系喺抖音。主要系拆账，平台点都去咗你一半，以前淘宝为例，就系品牌方买俾主播系计几个%，跟住例如买咗一件赚咗10蚊，平台都会杀咗一半，仲要报税呢，其实唔系赚得好多，不过系多咗人认识。但系抖音点拆法就冇理，剩系同呢间公司拆，佢俾几多我，我接受咪做，每次最少要做三个钟，因为头一个钟要warm up，等人入嚟同推流量，到咗中间嗰个钟，人流系最多，最后一个钟，啲人会慢慢流失。」她还笑说：「其实仲有好多术语，我都边学边做，而且我啲普通话都得，咪唯有讲港普，有时讲到佢哋觉得好开心，我做系讲笑多啲，有时会笑住闹吓佢哋。有啲直播喺侧边会有好多小助理，佢哋会带手讲，我就系自己做，自己执货、Set嘢，想讲啲乜嘢，乜都自己嚟。有阵时啲留言好多，我又冇助播喺身边，唯有叫佢哋留多几次，好彩我已经做到有一班固定嘅粉丝，佢哋会帮手答，真系好好。」
受内地粉丝欢迎感满足：嗌得出个名
问到收入好过做艺员？黄梓玮坦言：「一时时，等于你开铺做生意，有时会好旺，有时都会唔旺。但系你问我，有时我哋喺度倾3粒钟，可能只系赚得几百蚊，但系你返去TVB，拍一场戏可能一个钟搞掂，就执咗一个骚，呢样就好难去厘定，所以冇得话边度好边度唔好，唯有尽做，但系如果你问我，拍剧定带货，我一定会拣拍剧，我始终都系喺嗰度出嚟，而且又系锺意嗰样嘢。不过带货就可以同啲粉丝近距离倾偈互动。」
黄梓玮续说：「佢哋通常都会问你拍过啲乜嘢，咀戏系咪真系锡，有冇同边个合作，好得意，又试过问我嗰阵同刘德华合作，佢好唔好人，其实佢哋有睇先会问，有啲我自己都唔记得。好似最近去咗内地，佢哋系嗌得出你个名，仲话有睇你抖音同电视剧，嗰种感觉真系好开心，好满足，虽然喺香港佢哋会知你系边个，不过除非你系一线，如果唔系都会觉得你系茄喱菲，有时系唔好受，但系都习惯咗，始终都做咗20几年，但系你返咗内地，嗰种满足系真系唔同。」
黄梓玮同一时间经营两个抖音帐号，因为语言问题，某程度上系有点局限，她说：「普通话唔得，再去远啲有难度，你问我而家通咗关有冇影响？其实系有，尤其系我普通话唔好，局限喺广东省同大湾区，佢哋随时可以自己落嚟买，但系好多粉丝话信我先买，唔去其他地方买，系开心。另一个号系生活化，有一个女仔帮我，每次都有人写稿，大家会倾，睇吓内地嘅人想知道香港啲乜嘢事，又或者返内地去饮饮食食，去探店，介绍啲好玩好食嘅嘢，吃喝玩乐，有啲系即兴，但基本上系一定要写稿。每段片嘅内容都要试，睇吓啲网民锺意啲乜嘢，慢慢拍开嘢，知边啲嘢系唔会有兴趣。」
获内地楼盘邀拍广告
再问会否向一线主播进发？黄梓玮说：「其实冇话一线唔一线，都系好现实，成效高咪叫大主播，我都会朝住呢个目标进发，等于你拍剧，都希望可以上位，所以我哋要开多啲直播，拍多啲片，如果曝光率多咗，自然会有人问你，返内地商演同工作都系一个方向。本来有个楼盘活动邀请我演出，不过最后撞咗开工日期要取消，我一定会开剧为主。亦都试过有人问，有啲楼盘广告可唔可以帮帮手，但系因为喺抖音同淘宝系唔可以直播介绍楼盘，亦都有啲赞助，有啲系拍片，但价钱唔系太好，仲试过有人搵我喺南沙做嘢，佢哋话想搵啲入屋嘅师奶，主力系sell钢铁，我都觉得奇怪，点解唔系要搵男人？」
黄梓玮最初亦未有想过有这转变：「冇谂过㗎，只系因为一个疫情，而令好多人生活方式都有转变，但系我觉得OK，几好玩，TVB返工咪返工，冇工开咪返嚟，有时都会偷懒去玩唔开播，当然方向系想上去，任何一样嘢都想试，呢个算系自己宣传自己方式，都可以算系一个新出路。」
《星岛头条》APP经已推出最新版本，请立即更新，浏览更精彩内容：https://bit.ly/3yLrgYZ
最新回应