专栏｜有幸见证夏神发光发亮

夏萨特喺10月10号宣布退休，好多锺意佢嘅球迷即时好大反应，亦有部分球迷眼中就净系识食汉堡包，无纪律嘅球员。但小弟喺过去三四日回望佢整个车路士生涯，先有深切嘅感触。

小弟今年先20岁，要讲到有画面定必系2014至15球季车仔攞英超一届。每场睇住夏神点样左穿右插，明明系俾人重重包围，依然可以杀出一条血路，令我了解到车路士嘅标准同对胜利嘅执着。不过呢个球员就系一季好一季差，翌季就同班Friend反转更衣室玩死Daddy。我嗰阵时百思不得其解，夏神点解要咁做？干地嘅两个球季就好似再经历呢个轮回，只系片段更加深刻，令我明白到咩叫办公室政治，但有料嘅人根本唔会惊，佢会用表现去征服你。

去到告别嗰季，好早知道佢会离开，有好多嘅最后一次，尤其喺巴库大放异采为车路士再次举起欧霸杯。最后访问讲咗一句「It\'s Time To Say Goodbye」，嗰一刻我知道一切都完啦，喊咗出嚟。

近一两季我先明白点解车路士有夏萨特系好幸福！因为佢先系真正嘅魔术师一个人玩晒，差唔多俾人除晒衫，都能够喺顶帽入边抽只白兔出嚟嘅一位天才。

即使去到皇马无一场好波俾人闹，但我好庆幸沿途可以望住佢发光发亮，已经足够。记者问佢退休嘅原因，佢话唔享受足球，令近排迷失嘅我，提醒番做自己锺意嘅嘢最紧要，做人就系咁简单，我爱你夏萨特！Willhappy

-----

《星岛头条》APP经已推出最新版本，请立即更新，浏览更精彩内容：https://bit.ly/3yLrgYZ