星8卦｜「猛男」衰寸被杯葛难得复出故态复萌火速被飞

2023-10-10 11:00

因为臭寸喺最当打时候俾剧组飞起嘅「猛男」完全唔知错，加埋娶嫩妻之后可以咬软，品性就更加乞人憎。但男人嘅自尊唔可以长期被压抑，嫩妻亦觉得老公有啲唔妥，帮佢搵咗个真人骚做，希望佢搵番啲自信。

「猛男」个名都花咗，老婆托咗好多关系至整到佢有工开，仲吩咐佢生性做人。鬼整佢第一、二个星期仲正正常常，但去到第三个星期「猛男」又开始见人唔睬，成日迟到，自己又cheap唔舍得请个好啲嘅助理，贪平搵咗个𡃁仔，完全唔识帮佢打点人情关系。初时制作组都会忍下，但久而久之太多人投诉，最高领导人觉得唔使畀面，就喺嗰个星期决定要佢返屋企。

不过好彩都有人陪，另一位啱啱宣布回复单身嘅「烦人」亦同佢一样遭遇，火速俾人叮走，原因都系寸过码头咕喱，仲要唔合作，叫佢做乜都有理由话唔啱自己，激到监制生虾咁跳，未够三日已经叫佢执包袱，所以论瘀仲有「烦人」垫底。「猛男」咁快返归，初时都惊老婆日哦夜哦，点知嫩妻非常高兴，欢迎老公返嚟身边，唔使再担心国内啲女仔埋身，到时又要出手对付，而家落得安心，毕竟两公婆唔系等钱开饭。