专栏│拜仁瑰宝当属汤马士梅拿

香港队嘅奇迹之旅，对住强过我哋嘅对手，旁述会话佢哋「一人跑多一步」，但小弟近排睇拜仁一直都觉得无人肯跑多一步，形成经常上半场斋搓，下半场靠个人质素屈机嘅局面。但有一位球员，每当佢落场，队波组织随即多咗流动性，佢就系汤马士梅拿（TM）。

TM呢位球员喺足球界好特别，速度唔算快，个人盘扭亦唔算强，佢嘅卖点定必系阅读球赛能力，适当嘅时候出现喺适当既位置，佢喺拜仁咁多年都系骨干，只系近几年年纪渐大，体力无以前咁好，开始要坐板凳。

拜仁今季即使面对实力差不多嘅对手，感觉都系好难占优，前场球员经常企死啲位置，哈利卡尼每当被对手冻结，中后场就迟迟分唔到波，导致经常断缆，例如上周德甲面对有质素而且会尝试压逼嘅RB莱比锡一役，当中2个失波就系活生生嘅例子。唔系话穆斯亚拿、利莱辛尼或京士利高文唔好波，但佢哋都属于要上脚既球员，好多时候习惯等波到，加上佢哋用波时嘅第一选择都唔系传波，而系扭几个对手再起脚射，所以TM喺度就可以畀教练多一个选择，因为佢就系往往为队友着想嘅球员。正如刚周中欧联作客哥本哈根致胜嘅一球，TM明明单刀，虽然速度唔够快俾对方后卫追上，佢仍无夹硬射，而系先食身位护住个波，再助攻畀走个靓位嘅队友马菲斯泰尔近门射入，完全凸显出佢嘅足球智慧。

TM一年大过一年，对球队影响力越嚟越细，一定系事实，但我每次坐喺电视前睇佢踢波，依然会赞叹佢喺球场上嘅每一个决定，每一个选择，佢就好似有上帝视角，跑一个只有佢先走到嘅靓位，TM真系一个Special One。Willhappy

-----
《星岛头条》APP经已推出最新版本，请立即更新，浏览更精彩内容：https://bit.ly/3yLrgYZ