古天后日志｜港股越玩越缩 今年未见瞩目IPO 港府救市仍未见影

9月27日，大致天晴，但局部地区有骤雨，日间天气酷热。美国除咗联储局口吻近日鹰到爆之外，就连市场都开始相信美国息口仍未见顶，细摩CEO话美息要升至7%先到顶，吓到隔晚美股啲银行股散晒，三大指数隔晚显著下跌，道指跌388点；标指跌63点，失守4,300点关重要支持，纳指则跌207点。VIX升至接近19水平。之前都讲过，美股估值唔平，当值博率变低，自然无资金愿意高追。

美国新财政年度预期谈判进展缓慢，市场又再担美国政府停摆，近年两党就财案每次均见争拗，就成为大市回吐藉口，最终两党都会喺限期前达成共识，因此政府停摆只系大户短期震摄市场嘅藉口。反而真系影响美股走势系经济表现，下星期公布就业数据，一旦失业率回升，过份鹰派嘅言论随时又被推翻。从实际情况嚟睇，通胀其实算系受控，若然系咁嘅情况下，联储局继续放鹰，或拖累美国企业进行融资，当就业数据开始疲软，联储局亦唔可以企得太硬。

今年港股未见任何瞩目大型IPO

不过暂时美息高企，令人民币重返7.3水平，表现持续疲弱，虽然人仔疲弱系不利中港股市，但却有助中国扭转出口持续下跌嘅劣势。阿爷亦唔太介意人仔保持喺呢啲水平，一来有助出口，二来内房债务危机下，人仔下跌有助减低国内资产下跌压力。不过人仔咁弱，亦系会引发资金外流问题，阿爷就只有沽美债去换回美元。

至于中港股市都无乜好讲，人仔疲弱令本来估值低廉嘅港股亦难以吸引资金入场，无新资金入场，港股缺水自然易跌难升。而唔少股份见大股东今年内持续减持，阿爷就已出手阻亦呢个情况持续。继上周内地公布管控国内基金沽空策略后，噚晚又出招，明确规定主要股东减持主要条件，控制大股东掟货，从而稳定市场信心。

港股呢边仍未见港府有任何动静去刺激市场，乜嘢小组成立多时，连基本减印花税以减低入场成本激活成交呢一步都未有意思去做。单睇今年全球股市集资额，目前港股已跌至第八位，阿里（9988）表示分拆菜鸟上市，市场亦唔见得有几兴奋，毕竟呢个消息都吹咗半年，乜嘢都消化得七七八八。而今年港股未见任何瞩目嘅大型IPO，莫讲话三甲地位不保，甚至跌出五大集资市场，过往嘅纽伦港，国际级金融中心光环渐退色，港府继续无计可施，长此落去，香港只有沦为大湾区金融中心。

相关文章：
港股市况｜港股开市微升 阿里分拆未「冲喜」 旭辉孖宝复牌双双跌五成

---
《星岛头条》APP经已推出最新版本，请立即更新，浏览更精彩内容：https://bit.ly/3yLrgYZ