星8卦｜「学霸」背景乾净入豪门 EQ高笑对小三力保阿太位置

2023-09-26 11:00

做阔太系咪真系好幸福？有钱生活无忧但唔忿气加寂寞，似乎系抑郁症嘅成因。「学霸」读书叻，家境正常，可以话系乾乾净净，除咗入行时同「哥仔」拍过一次拖，简直可以话系俗流中嘅清泉。「老爷」好早就睇中呢个女仔，搵人明查暗访，于是安排机会畀「太子」见面，仲讲明佢出面所有女人一定入唔到宫，做自己新抱一定要背景乾净。又系嘅，「太子」非常杂食，仲要系啲唔正经女人，佢又好负责任咁搞过就养一世。

「学霸」有个势利阿妈，如何捕获「太子」都系依循佢嘅方法一步步成功，所以「学霸」成为城中最令人羡慕嘅女人。事实呢，结婚后即刻做咗生仔机器，「学霸」都明白咁样至令自己地位巩固，但耐唔耐就会收到一啲奇怪留言，喺边间酒店几多号房有嘢睇。有阿妈教路，「学霸」梗系不动声色，因为大把女人争住坐自己呢个位，初时都有搵人去睇吓乜事，一次之后了然在心，从此就唔再有乜反应，继续扮上流社会上流人，仲要喺「太子」心目中大方得体，已经决定点都唔放开呢头家。

总之表面幸福，只要洗吓自己脑，肯定自己地位100年不变，出面啲女人继续幻想无法子㗎，「学霸」EQ之高，简直是女人典范！