星8卦｜「正气」娶「温柔」打响如意算盘遇着刁蛮阿妈迟早玩完

2023-09-22 11:00

如果啲老人家唔识做，真系害到后生一辈，尤其嗰啲恋仔狂，直情对做新抱嘅嚟讲，唔嫁好过嫁。因为出身背景相似，都系同一行，所以「正气」同「温柔」遇上好有天造地设嘅感觉。

问题系「正气」出生于破碎家庭，阿妈一直同「正气」好亲密，佢都有谂过第日有新抱自己点样好呢？当「正气」带「温柔」返屋企时，阿妈即刻黑面，畀晒说话「温柔」听，经过好一段时间，「温柔」用咗好多方法至令阿妈唔好单单打打。好在「正气」明白事理，好多时喺屋企受咗气，佢就对「温柔」特别好，基于难得有情郎同埋爱情大过天，「温柔」都无乜细想就决定嫁畀「正气」，虽然阿妈实在好难顶。

婚后生活如何？咪好似抢咗人哋个仔咁成为阿妈眼中钉，不但无办法搬出去住，仲要日日食饭唔可以一齐坐，新鲜煮嘅就阿妈同「正气」食，「温柔」只可以同工人姐姐清咗前一晚嘅餸菜，食食埋埋身体迟早都出事。最惨「温柔」有名你叫，已经好就得人，「正气」都以为娶呢个一定搞掂阿妈，后嚟佢见势头越来越唔对，同阿妈讲话要搬出去住，但阿妈成个癫晒，要生要死，「温柔」都唔敢出声，掉转头叫「正气」忍吓，不过最近听讲两个唔系好掂，已经分居咗，但「正气」努力箍煲，今次真系唔知点好，但「温柔」再同佢一齐，迟早搞到情绪病，都系及早离开为妙。