名人杂志丨193企硬:唔会做倒模式艺人 大爆因「前度」改变人生 再见难做朋友

ERROR成员郭嘉骏（193）向来瓣数多多，近来除拍完综艺节目《ERROR暑假自作业》、电影《阴目侦信》亦已上映，接下来中秋节又会搞个人品牌的生意，10月底更将首次演出舞台剧《Laugh Vacation》，工作可谓排到密麻麻。本月中，193终推出今年首支派台歌《以为只是没送花》，早前他接受本报独家访问，大谈工作近况、恋爱史、择偶条件，及为「谢票风波」作回应，当中更提到与花姐相处间的小秘密。

郭嘉骏（193）向来瓣数多，今年工作可谓排到密密麻麻。

193推出今年首支派台歌《以为只是没送花》

193早前接受本报访问，谈到新歌内容，提及花店及咖啡，并将自己与前度的真实经历也写入歌曲中，他表示：「其实呢个女仔影响我几深，例如佢嗰阵想收花觉得好靓，但我觉得几百蚊摆一个星期好嘥钱，所以咁耐我只系送过一次花，做呢首歌嘅时候，我都谂返起呢啲画面。」他笑言现在的他宁愿送「包包」，反而觉得比较实际 。

早前接受本报独家访问，大谈工作、恋爱史、择偶条件。

原来193去年开cafe都是受前度影响，「以前一直都唔饮咖啡，觉得又酸又苦，有个女朋友却特别锺意去Cafe打卡，自己亦慢慢锺意了咖啡这种味道，最后开埋咖啡店。」193表示与前度再见不是朋友，很少联络，一来怕尴尬，二来免得影响对方发展另一段感情。

193去年开cafe都是受前度影响。

择偶:顺眼邻家女孩就得

现年33岁的193大谈择偶条件，「我会prefer细水长流兼平平淡淡嘅爱情。当然我知道大部分后生女都唔系，所以要啲老女人，已经经历晒所有嘢，唔需要再有浪漫嘢。」未几，搞笑的193又立即转呔表示大年纪唔得，理想对象要细10年的女性：「如果我搵同年纪嘅女仔，佢会进入逼婚阶段，所以如果搵细10年嘅女仔，佢30岁，我40岁就啱啱好啦，但始终件纪细的话，彼此经历好唔同，思想就难夹啲。」他更觉得潜意识觉得一定要同高妹拍拖，衬返自己，但从来冇试过。

问到介唔介意女仔整容？193搞笑表示：「整容的话，拍散拖都得，如果要过人世，就要谂好长远，可能第二时生个小朋友出嚟好丑，同个样完全唔一样咪大镬。微调都接受到，整容就麻麻哋，我冇特别标准嘅靓，顺眼邻家女孩就得。」

193赴台湾与两大女神林莎、李恩菲拍MV。

性格:唔想变成一式一样

193一向出名敢言，有网民认为193态度过分「寸嘴」，直肠直肚作风经常成为网民箭靶，但他坦言性格冲动是真正的自己：「以前好care，直情有谂过开啲Account扮fans回覆自己，我明白有正评一定有负评，唯有尽量避免睇。我怕我为咗人哋改变自己性格，变成一式一样嘅艺人。啲人锺意193咩嘢？唔通锺意我唱歌跳舞咩，锺意193就系因为佢嘅个性，所以我唔想改变我自己，但有时冲口而出最衰就系令自己后悔，改变唔到事实，我会记一世。」

193早前往台湾拍摄新歌MV，为隆重其事，香港台湾老婆联手应援，出动餐车现调消暑饮品，现煮台湾小食！

193又重提近日新片《阴目侦信》的「谢票风波」，早前他在社交群表示，因谢票收到骚扰信息，自言不会出席谢票活动，因而牵起风波，他表示：「呢件事上面我绝对有错嘅地方，因为我太多工作，导致我有啲谢票场冇去到，过咗一日收到花姐电话，佢一句都冇闹我，仲妈妈式关心我『我唔可以每次都帮到你，你要自己照顾自己啦』近年花姐忙咗好多，就算佢唔得闲都会搵其他人照顾我哋。」

由ERROR成员何启华（阿Dee)、梁业（肥仔）、吴保锜、郭嘉骏（193）主演的电影《阴目侦信》，4子早前首度合体到戏院谢票，与观众互动交流。

193虽然发生「谢票风波」，但其实他非常有心，一有空闲便会尽力出席谢票答谢观众。

投资:唔蚀钱已心足

193去年与友人开咖啡店，问到他的投资心得，他大方透露：「咖啡店真系冇赚钱，你谂吓做几耐先回到百几万装修费，所以纯粹系一个情怀、为兴趣。做到中段直情要蚀钱，之后同咗一个饮食集团合作，食物质素及宣传做得好咗，开始赚返钱，我嘅愿望系一直run落去，唔好蚀钱已经心满意足，唯一有可能会执笠，系我嘅partner觉得赚得唔够多，始终人哋都系商业营运，要花心机经营，但赚得不多。」他又透露自己是爱车之人，亦会投资在车上：「有架车，我喺日本买返嚟40万元，而家升到60万，我冇乜娱乐，返工放工之外，揸车就系我唯一娱乐，车，令我有me time，但都开始准备想投资工厦或者一啲单位，而家楼价开始跌，都想买层楼俾父母。」

193虽然发生「谢票风波」，但其实他非常有心，一有空闲便会尽力出席谢票答谢观众。

宠粉:唔想流失一个

向来宠粉的193去年曾扬言要做好每一件事，望能让「老婆」们能自豪地说：「我是193的粉丝。」对于粉丝多年来的支持，他表示：「我觉得我啲fans系比较乖，只要我肯同佢哋沟通或者叫佢哋唔好咁做，佢哋都几听话，但「咩人跟咩人」有时佢哋见到Haters留言，有啲真系会闹人，我有时唔小心睇到都会觉得，哗！点解把口同我一样，真系咩人钟意咩人！我相信有唔少人因为我嘅言论离开，但如果系咁我唔care，咁即系代表佢本身唔了解我嘅性格，所以佢走咗都唔系我嘅损失，亦都唔系佢嘅损失，只不过系佢之前未了解清楚就锺意一样嘢。如果锺意我嘅人系知道我系咩料先，我都有留意有啲fans以前有开193 IG，我都有察觉有人少咗出post，不过每个人每个阶段锺意嘅嘢都唔同，可能佢识咗新男朋友，而佢男朋友又唔锺意193，好多唔同嘅原因，但我始终唔想流失任何一个。有时我会当咗佢哋系朋友，会同佢哋倾吓偈，睇住佢哋成长，有时佢哋考试都会同我讲；仲有啲人带埋仔女嚟，我听以前啲明星讲，fans嘅年纪系随着佢嘅年龄增长，佢20岁锺意我，20年后佢40岁带埋自己仔女去睇佢演唱会，呢个交流系好得意，互相见证大家成长好特别。」

他非常感恩谓：「我以为冇人会无缘无故咁爱一个人，但系原来真系有，所以好庆幸有佢哋。」

Do姐向来爱锡MIRROR、ERROR，对193亦都爱护有加，二人不止一次合体拍广告！

193大爆入行初期曾和花姐意见不合，但近年已搵到大家的相处模式，更感激花姐常用妈妈式关心他。

193表示第一首有钱搵填词人写的歌曲，便是写给「老婆」们；而「老婆」们搞的一切应援及包场活动都会尽量去，「有一日ERROR拍完MV真系好攰，揸车都瞓着咁滞，但都坚持去佢哋包场，因为知道佢哋真系衷心支持我，我会尽量满足佢哋。」

每次演出，193都会做足功课，找导师钻研剧本，之前他在剧集《季前赛》中饰演光仔，大获好评。

193将于10月底首次演出舞台剧。

撰文 : 娱乐组 摄影 : 谭志光、Nicky Jai 场地 ： Tanuki Coffee

《星岛头条》APP经已推出最新版本，请立即更新，浏览更精彩内容：https://bit.ly/3yLrgYZ