星8卦｜「纯品」被「精叻」出卖好无面因祸得福「猛男」照顾衣食无忧

2023-08-25 11:30

「纯品」一直当「精叻」系好姊妹，两个人好似孖公仔咁去边都一齐。因为两个女人都靠样貌同身材食饭，连搵老细都做伴。可能「纯品」始终后生啲，比较受有钱叔叔欢迎，「精叻」始终生得恶死，桃花运梗系唔够「纯品」旺盛。自从有两次大家一齐出击，都系得「纯品」有着落，「精叻」已经唔多想同「纯品」玩，成日多多藉口要自己出马，费事俾「纯品」坏自己大事。

好死唔死，嗰日两个人碰头，「精叻」𥄫中一个有老婆嘅「猛男」，对方讲明有几多酬劳，条数唔错㗎，但对方又系喜欢「纯品」，激到「精叻」谂桥泄愤。佢用方法知道「猛男」带「纯品」出埠开心，竟然同记者报料，仲出埋钱请佢哋住酒店，因为间房好贵，「精叻」惊影唔到嘛，结果返嚟搞到好大镬，「猛男」老婆搵人搞到「纯品」家无宁日。

男人就系咁，最爱弱势社群，谂住同「纯品」合约完后各行各路，见佢俾人虾得咁惨，决定将「纯品」纳为二奶，仲买咗层而家值过亿嘅楼畀佢，个个月仲有家用，生活反而好安定，唔似「精叻」继续奔波。