头条戏场丨《鬼咁多大屋》笑出声的合家欢恐怖片

英文片名叫《Haunted Mansion》，即系迪士尼乐园最受欢迎的经典鬼屋游戏。迪士尼以先进CG特技，将本来俾人玩嘅游戏升级兼改装为惊吓刺激又搞笑的历险电影。虽然话翻拍自2003年，Eddie Murphy主演的同名电影，都系有鬼屋有鬼然后被吓，但新版丰富好多，加咗一堆金像巨星，Owen Wilson、Jamie Lee Curtis、Jared Leto及Danny DeVito等，一屋好戏之人，齐齐讲经又山寨式驱鬼，对白极胶，真系全场Keep住笑出声。(上映中) 撰文:廖思慧
 

驱魔杂牌军，冇能力赶走恶鬼，唯有智取。

就系呢间平过市价好多嘅大屋，见到都唔想入。

电影Sell惊吓但迪士尼出品都唔会惊得去边，想睇失惊无神恭喜你，又想吓出一身汗嘅，呢套未必满足你。单亲妈妈Gabbie (Rosario Dawson饰)同9岁囝囝Travis(Chase W. Dillon饰)搬入一栋低于市价好多好多嘅大屋，平嘢冇好定律嚟嘅，入屋逗留一阵已知濑嘢，速逃后第二日被逼回归。

单亲阿妈同囝囝，后者由好惊变得勇敢，好感动。

法国嚟嘅通灵大师，一开口就好多废话，但有料嘅。

呢位厉害，重点推介角色，全片MVP。

因为要知大屋历史先可以对付恶鬼，有心脏病嘅佢涌住帮手。

高分娱乐片
Gabbie日日被吓，加上个仔超级淆底，惟有搵人帮手，分别搵嚟宇宙级讲经天才，流流哋牧师Kent(Owen Wilson饰)、丧偶灰爆超自然专家Ben Matthias (Lakeith Lee Stanfield饰)、法国七师傅，通灵大师Harriet (Tiffany Haddish饰)及有心脏病唔吓得的历史学家Bruce (Danny DeVito饰)，杂牌军组成驱魔大队夺回大屋，过程当然好论尽同尴尬，但同时非常好笑。

大屋有好多鬼，仲要乜国籍都有，好热闹。

Jared Leto饰Hatbox Ghost，睇完戏都唔知系佢。

被困水晶球好多年嘅灵媒KOL Madame Leota(Jamie Lee Curtis饰)

电影较预期好睇，特效出色，恶鬼离开大屋恐吓杂牌军最精彩，半夜晒冷式吓鬼非常缤纷，加上全片有好多笑位，小笑大笑甚至令你翻笑都有，宣传唔多认真可惜。

电影上映中。

《星岛头条》新网站有更多精彩内容：http://www.stheadline.com/