独家丨COLLAR自爆拍综艺最大死穴 DAY最大胆Candy越拍越勇Sumling见公敌即呕

2023-08-10 07:00

独家丨DAY最大胆Candy越拍越勇Sumling见公敌即呕 COLLAR自爆拍综艺最大死穴

自So Ching于5月宣布离团后，COLLAR重新出发，除推出最新团歌《idc》、到日本拍摄MV及第二个综艺节目《全日制COLLAR学院》外，更另设网上综艺节目《COLLAR COLLECTS》在自家YouTube频道播出。对于拍综艺，7人都有唔同嘅死穴，难得自爆完仲识讲笑，觉得公司制作部会好快搵佢哋挑战底线，原来COLLAR都几幽默。采访：杜杜摄影：Stanley 形象:Daniel Cheung、Chesney Lau 发型:Taurus Lee、Kristy Cheng 化妆:San Chan、Kineks ho、Cathy Zhang、Jenny Fung、Percy Shing、Janice Wong 服装:Dickies&Farfetch、Puyi Optical、Dr Martens 场地:香港康得思酒店

COLLAR已预计到公开讲怕虫，节目制作组应该好快会搵佢哋挑战。

7个女仔首次出trip都觉得好难忘，Sumling形容：「好似男女朋友第一次去外地旅行咁。」出发前经理人都担心她们会嗌交，Gao说：「同我哋讲agenda，劈头第一句就系相亲相爱唔好嗌交，哈哈！」Sumling补充，「我哋都相处咗好耐，知道大家性格，会识得点样去迁就，仲越嚟越爱，我成日幻想自己系男生，爱你哋每个人嘅唔同地方。」

COLLAR最难忘在凌晨在日本街头，为新团歌《idc》拍MV。

在日本拍摄《全日制COLLAR学院》，因一齐生活仲friend咗。

Marf原来系团妈

由于Winka好奇一问：「咁你爱我啲咩？」变成Sumling的表白时间，「我爱你嘅温柔同sexy，（Winka：我温柔咩？）你嗰啲嗲罗！好锺意同Candy玩，好正，佢不拘小节，唔会好小剧场，又好顾人感受；Ivy直情系视觉享受啦！几时望都咁靓，已经满足咗，同埋佢好识食，成日带我食好嘢；爱Marf有种好老婆嘅感觉，佢成日提我『唔好咁样翘脚，唔好咁样坐啦』，好照顾你嘅人生。」Winka都加把口赞Marf，「好似今日件衫，造型师已经帮我钉实咗，但系佢都话『唔得，你知你㗎啦，一笑大动作就会走光』。」被笑有妈妈feel，难得Marf都认同，「我同Sumling讲『每样嘢冇话最好，但你都唔会听』，哈哈！」

COLLAR开设网上节目《COLLAR COLLECTS》，已推出三段片。

Sumling怕虫，曱甴是终极最惊。

Sumling眼中的Gao是贤妻良母，「所有嘢都帮你打点好晒，仲好识帮你悭钱，我买任何嘢都会问佢意见，叫得我买都系适合买，叫我唔好买都系帮我悭钱，『呢个你有两件啦』，冇咗佢搞唔掂；Day就系可爱无敌，行埋嚟话『我想食呢个』，你已经好开心想喂埋佢食，哈哈！佢系好贴心嘅人，同佢相处完全冇压力，所以如果我系男仔，会要晒佢哋。」

Marf以为自己好大胆，但睇完ERROR节目就知未够班。

Gao觉得拍综艺好好玩，但好怕要玩虫。

底线可以踩出嚟

连拍两个综艺节目，成员都大呼好玩，讲到玩游戏底线，7人都各有死穴。Gao讲明最惊虫，「所有昆虫类，特别唔知咩嚟嗰啲。」Day最关心有冇得冲凉，「最怕整污糟咗冇得冲凉，有就OK！」Marf以为自己冇底线，但睇过ERROR的综艺节目后，就觉得未必顶得住，「虫我都OK，但唔系佢哋咁玩。（曱甴爬身得唔得？）我需要着好紧身嘅衫，好多呢啲条件，我谂都真系唔得罗，哈哈！但系你逼我，我又唔会唔做，逼到尽头我系OK。」此时Ivy「突破盲肠」，「个底线系踩出嚟嘅！」全场爆笑。而Ivy就抗拒玩恐怖嘢，「我未见过鬼又唔系特别信，但一个人去好黑、荒废地方，好惊就唔得！我之前玩主题乐园鬼屋，会掹住隔离嘅人同埋全程合埋眼，但系有COLLAR一齐可以试吓，起码我踎咗喺度都有人帮我嗌救命。」

Day是个爱乾净宝宝，最怕整污嘈冇得冲凉。

怕黑又怕鬼的Ivy，一句「底线系踩出嚟」，全团赞好。

Sumling致命伤系曱甴，「曱甴系有种令人好不安、恐惧、发恶梦嘅感觉，望住佢多3秒都想呕。」Winka同样怕虫，听见大家讨论已经话头痛，「我唔怕肢体碰撞，可以玩得好癫，但接受唔到虫，会尖叫海豚音畀你听，听到爆耳膜，虫真系唔玩得，真系会发脾气罗！有少少距离OK，如果要掂或者爬喺我度真系唔得。」对于底线可以踩出嚟，Candy绝对认同，「我嘅底线一次比一次低，本身好细胆，喺韩国好惊玩过山车，仲要360度转，最后又玩咗。今次都有样挑战，一直冇幻想过会接触，全世界最惊嘅一样嘢，但我去咗接触，未出街卖个关子先。为节目好睇，会愿意尝试，除非有生命危险。」