独家丨60岁莫少聪被指潦倒直认悭家罕谈洪欣 16年自爆婚变原来从未离婚

2023-08-08 07:00

1988年，「大眼仔」莫少聪凭电影《中国最后一个太监》一炮而红，在娱乐圈打滚逾30年，近年变得低调，之前有内地网民影到他以寒酸衣著做商演，又指60岁的他老态尽现，甚至指他离婚后独力抚养女儿，所以生活潦倒。莫少聪以型男Look接受《头条日报》独家访问，他先开心谈及有留意香港娱乐圈，欣赏姜涛有上进心又直认生活悭家：「悭畀个女都好呀！」再强调，「我冇离婚。」更非常难得地谈陈年旧爱洪欣及22岁大仔张镐濂。采访：方骞平摄影：朱伟彦场地：佐敦Mizu

60岁的莫少聪多咗佬味，黑黑实实，冇乜大走样。

「登六」都皮光肉滑。

莫少聪挺身交代婚姻状况。

莫少聪变身中佬型男。

回港跟家人享受家庭乐。

11岁半囡囡莫芷嫣无意入娱乐圈。

两父女好Sweet。

聪哥喺囡囡面前变cute。

近年莫少聪为妻女长居北京，趁11岁半囡囡莫芷嫣放暑假，便带女返港探望中咗风嘅妈妈，而每次回港，聪哥都必定去街边食最挂住的拮鱼蛋，仲食到好滋味。16年曾在微博出PO称跟老婆「未能携手走到最后」的聪哥，大众均以为他做咗7年单亲爸爸，他对此作出澄清：「我有老婆，同孙云玲结咗婚12年冇离过婚，佢唔系歌手，今次太太冇随行。」他形容家庭生活简单但美满：「平日会亲自做早餐，然后凑女返学，我好宅，大部份时间留喺屋企上堂学书法、读吓历史书、整吓嘢食，唔会出去应酬。」对于曾出PO自揭婚变，聪哥称当年一时意气，「两公婆因为生活事闹得不快，讲咗一啲意气说话。好彩之后双方平心静气，再研究点去解决同点相处，𠵱家一家三口生活安好。」

两父女喺酷热天都要喺街边拮鱼蛋，食到成身汗但乐在其中。

莫少聪提供从未曝光的温馨家庭照，今次老婆唔一齐返全因执到两只浪流猫要照顾，唔方便行开。

2016年，聪哥在微博出PO称跟老婆「未能携手走到最后」，全世界以为佢离婚，原来唔系。

生活简单悭钱畀个女

因为疫情少做幕前工作的聪哥热心公益活动，「𠵱家经营茶业小生意，亦有投资做媒体，内地生活冇香港咁大压力，我哋只系食猪食鸡，一年食得几多呀？而且住北京郊区租金点都平过香港。」对于被指生活潦倒，连见得人嘅登台衫都冇钱买，聪哥笑言衣不称身只系角度问题，当日屈喺架车两小时等出场，所以坐皱咗麻质西装：「我『登六』都唔再需求物质啦，食得饱开开心心，陪多啲个女，但都悭嘅，悭畀个女都好呀！」

之前莫少聪做户外商演，被指衣不称身，老态尽现。

莫少聪下厨煮青菜蛋面，生活简单。

聪哥不时做慈善公益。

出席《少聪爱人行动》。

仲深入山区。

拍戏亲身四楼跳落街

聪哥自爆多年前TVB曾向他招手，离港多年的他好留意香港娱乐圈亦想回港拍戏：「有留意姜涛，呢个男仔形象健康又可爱，而且好有上进心。」他又有感而发，指时下做艺人好幸福，当年个个主角都有血有泪：「好记得拍《龙凤茶楼》时因为替身跌断脚，要亲身上阵拍摄连串危险动作，由4楼跳落地下个货车斗，再飞身落地跑去对面马路，现场得3张『榻榻米』真系惊到脚软，跳落货车斗时好似跳楼咁，由于冇得NG就忍住痛系咁跑，期间听到围观者话『呢个镜头真系多多钱都唔拍！』结果拍完一个月尾龙骨裂，一段长时间行唔到路，就算𠵱家都有好多旧患，不久前左手手肘要做手术。」聪哥说当年个个做主角都好抟，「刘德华拍《龙之家族》时都硬食武打演员狄威一脚，被踢晕啦。」当年搵埋辛苦钱，就供胞弟去美国读书。

聪哥有留意近年香港艺人，大赞「人气王」姜涛可爱又上进。

当年拍电影《人海孤鸿》，由6层楼撑住落地都好危险。

聪哥亲身上阵。

落地一刻几乎弹出蓬外。

《孤》片有跟刘德华、罗美薇多对手戏。

33年前拍电影《龙凤茶楼》，聪哥亲身上阵由4楼跳落地下个货车斗。

落点要对准地下个货车斗，跳下时车斗都震咗一秒。

再飞身落地跑去对面马路。

同星爷合作。

36年前莫少聪凭电影《中国最后一个太监》一炮成名，提名角逐金马及金像影帝。

聪哥𠵱家都有好多旧患，不久前左手手肘要做手术。

当年跟张国荣拍剧集《甜甜廿四味》时，两曾交换衣服。

当年搵埋辛苦钱，就供胞弟去美国读书。

赞大仔好坚强有联络

提到分手N年的洪欣，访问前强调唔想多讲的他坦言，「双方有自己嘅家庭咪几好罗，最重要仔女好，佢带住子女都唔容易，个仔𠵱家可以独立，要畀多啲鼓励佢行自己嘅路，有需要嘅，我永远喺度，随时畀电话我。」对于跟洪欣所生的22岁儿子张镐濂，聪哥只称有联络亦不想多谈：「各有各生活唔好打扰佢，我个仔好坚强及明白事理，佢冇埋怨过我。」至于洪欣跟年轻10年嘅老公张丹峰屡传婚变，聪哥眼中两人系恩爱夫妻：「我觉得佢哋几好呀，两公婆耍吓花枪啫，希望大家都一齐幸福落去。」聪哥觉得感情事冇错与对，唔适合就分开，日后仍可分工合作。