星8卦｜「绝色」被「富佬」利用后即弃「专业」蒲头力追结良缘

2023-08-08 11:30

试过几次婚姻失败，「绝色」终于开窍，唔再以嫁个有钱人为目标，开始搵一啲唔使搵好多钱，但又有社会地位嘅专业人士。话说之前嘅「富佬」一直有第二个，唔知点解对「绝色」生滋猫入眼，竟然搞到要公开恋情，其实系希望借「绝色」嘅名气令自己人气更高，结果「富佬」身家暴涨几倍。问题系「绝色」只系佢枱面嗰位，全部私人聚会，「富佬」都系带一位廿零岁嘅后生女喺身边，听讲妹妹十年前已经跟喺身边，样靓身材正，而且愈养愈有贵气，「富佬」同佢一齐直情有初恋嘅感觉。

可惜出身背景都帮唔到自己，于是要收埋喺屋企，亦唔畀佢出嚟见咁多人，费事见得太多花花世界心都野走佬。「绝色」几十岁人以为自己真系好好命，殊不知只系一件工具，当然分手后「绝色」身家又倍增，完全无蚀底。

呢个时候「专业」出现，佢嗰位拍咗30年拖嘅女友一直等有结果，点知「专业」知道「绝色」回复单身，即刻叫「擦鞋仔」介绍，「绝色」对男人梗系有一手，好快就迫30年女友自动求去，以正印女友身份出现「专业」嘅朋友圈，闻说两个人会秘密结婚，今次都系「专业」赚㗎，有个出名老婆肯定令佢事业更上一层楼，收钱收到手软。