独家丨锺卓颖Ash感激ViuTV冇放弃对Nathan有建议 人妻传偷食MC被海啸式围插死过翻生
2023-07-31 07:00 
2021年参加《全民造星IV》入行的锺卓颖（Ash），最近在ViuTV黄金时段频频曝光，包括孖住师兄193主持英国探灵节目《撞鬼自驾游》。提到Ash自然联想到张天赋（MC），曾是人妻的她一出道便跟MC传绯闻，再被前夫阿龙控诉出轨，纯情白衣天使速变淫妇，狂收粗口负评的她选择闭关两个月，最终福大命大公司冇放弃，虽然负评冇停过，但已学识睇开啲，对于MC，她强调怕再惹误会，已冇见面，至于同样负评缠身的《造星V》Nathan（魏念恩），呢位过来人有少少提议。采访：杜杜 摄影：谭志光 服装:@yanyanknits
去年Ash跟公司开会时，主动提出要求拍灵异节目，最终得到拍《撞鬼自驾游》机会。她不但自小听《恐怖热线》，亦是ViuTV《总有一瓣喺左近》铁粉，更因家人关系，令她自小对超自然现象特别好奇，「可能体质关系，佢哋好多灵异经历，但我就冇！所以更加好奇，好想接触吓。」
寸嘴193好识照顾人
首次跟193合作，Ash都担心寸嘴的他难相处，「大家认知嘅佢系『你知我咩料啦』，会唔会好难相处、沟通，或者好大男人呢？！点知又冇喎！咩都会问我OK唔OK、好关心人，我中途唔舒服，佢都捱义气帮我顶。」在Ash眼中，193原来非常man，「有啲地方好窄好黑，得返我哋两个，更加见到佢会照顾人，惊都要做，佢表面上话卸畀我嗰啲佢都肯做，唔会推我出去。」
虽然Ash当年参加《造星IV》60强止步，但因外形和歌艺不俗，被foul后「还我Ash」之声不绝，但随即被爆人妻身份，兼被发现跟拍《时候不早》MV认识的张天赋行超市，前夫甚至闯入MC Live留言叫MC对Ash好啲，令她形象插至地壳底。结果她加入ViuTV一年多，直到今年5月跟樊沛珈主持的《撞名撞城游一番》，才令她首次在黄金时段亮相，她坦认面对观众有压力，但最终明白，「就算几好嘅人都会有人唔锺意，做得几好都会有人唔喜欢。」
感激冇放弃照签约
出轨事件对Ash打击极大，现在她已学识睇开啲，「未签约前，我都有同鲁生（鲁庭晖）、高层倾过，佢哋都同我讲艺人条路唔易行，可以好bumpy，我话『我做医院，啲EQ应该OK嘅』，我系低估咗，当真系发生时，条路系可以咁样㗎！嗰时收到啲讯息都系闹㗎！听晒一世人听过嘅粗口！」她觉得最委屈是连《造星IV》的表现也被误解，「大家觉得我设计咗个人设，觉得嗰个未必系我。」
可能情绪压抑得太紧要，当时Ash竟然喊唔出，宣泄不到唯有靠闭关来沉淀自己，「困咗喺屋企个几两个月，瞓咗好多觉，以前系机不离身，嗰阵个电话放喺好远，咁对我最健康，知嗰样嘢会影响心情，就唔好去接触，好消耗精神同心情，因为唔食饭，屋企人望住我个样会好担心。」她又澄清当时仍未跟ViuTV签约，但公司一直冇放弃她，「大家有个误解话，『摆明系出事之前签咗，冇得唔用啦』，但其实我系事后先签，公司就系话『唔会因为你嘅舆论而放弃你』，呢样嘢好感动。」
强调同MC真系唔熟
除了公司支持，因为家人和朋友的爱令Ash企返起身，「《造星IV》朋友仔send好多message关心我，嗰阵有个罩罩住自己，接收唔到任何资讯，有日《造星IV》Liu 哥（廖雪荞）捉我去行山，先吸收返新鲜空气。」问到《造星V》Nathan（魏念恩）同样因感情问题出事兼退选，她称没资格畀意见对方，但建议用沉淀对抗负面情绪，「点样去沉淀就要自己搵方法，以我嚟讲朋友同屋企人嘅爱系最紧要。」
25岁的Ash早在23岁结婚，因在医院工作时好多同事都早婚，氛围令她想组织家庭，所以跟阿龙认识年多便结婚，但相见好同住难，「一齐住先发觉有啲嘢唔夹，先知太迟，我下次拍拖，想同嗰个人认识耐啲，最好有共同朋友，识得佢仲耐过我，话佢系好仔我会信心大啲。」问到跟MC爆绯闻后仲有冇朋友做？她就解释跟对方其实唔熟，「我哋倾偈真系唔多，有互follow大家ig，但系冇约出嚟食饭，唔好令人误会。」
《星岛头条》新网站有更多精彩内容：http://www.stheadline.com/
最新回应