星8卦｜「家姐」屡受情伤心急嫁人掷重金玩相睇

2023-07-28 11:00

女人一到咗咁上下年纪，难免系锺意求其搵个男人嫁一嫁，总系觉得就算离婚都叫嫁过，做咗人生一件事无遗憾！「家姐」情路可谓坎坷，一直都遇人不淑。同「青梅」搞足十几年，日日俾人催结婚，结果有苦自己，对方嗰位势利阿妈一直阻头阻势，喺出面就话想阿仔快啲结婚，其实背后搞好多小动作拆散，嫌「家姐」出身唔够好。

之后同「整容」一齐，虽然细自己好多，但可以重拾初恋嘅感觉，不惜打埋本畀佢做生意，营运唔错㗎，可惜俾佢知道对方两岸三地各有女友一个，自己唔系香港区唯一代表，伤心到就嚟要自杀。

去到一个年纪，你拣人人拣你啦，朋友就介绍佢去私人婚姻介绍所玩配对，成件事唔使廿几万，但无话包生仔，不过搵畀佢相睇嘅对象都好高质素，又够保密唔会周围讲。最好系相睇地点系外地，所以呢排佢一个月飞几次就系享受呢啲服务。「家姐」亦讲到明唔要「整容」嘅同乡，而且要三十几岁嘅小鲜肉，仲要拣靓仔。大家都笑佢死性不改，贪嫩口到头嚟又系伤到自己，何况呢个岁数嘅男人又使乜相睇呀，希望「家姐」快啲有着落啦！