独家丨蔚雨芯被网民屈靠富贵旧爱发达谷鬼气 怒斥网媒报假新闻：唔求证就照抄
2023-07-27 07:00 
下月30岁的蔚雨芯（Rainky）入行11年，在TVB拍了9套剧，最近终凭《灵戏逼人》的电台DJ「Karen」一角首度被赞，令她开心到喊。虽然跟TVB还有几个月约，美容生意又愈做愈大，但她明言唔会放弃演艺工作。因为4年前荣升老板娘，Rainky生活变得富贵，被指外貌进化，她大方承认有打美容针保养，但对于被港式内容农场的网媒老屈靠男人发达，强调搵钱靠自己的她嬲到要发声明澄清，「冇记者访问过我，就一间抄一间！」Rainky怒斥网媒歪风，见到网上传闻冇尽传媒责任去求证采访，非常唔应该。采访：杜杜 摄影：Stanley 场地:Glasshouse Greenery (Victoria Dockside K11 Musea)
Rainky去年拍《灵戏逼人》时，撞正美容院筹备开张，虽然有用心拍，但冇预期有好反应，「11年嚟第一次获观众有少少肯定，见到新闻感动到喊出嚟，冇谂过仲有几个月完约，上天会畀粒糖你罗！」她认为得到观众赞赏较攞奖更开心，「话爆喊系演技大爆发，又话希望我提名女配角，全部正面说话，入行到𠵱家仲系『魔鬼胸』，性感、靓呀，其实听到好厌，奈何真系冇一个代表作去洗咗呢啲嘢，观众嘅肯定真系重要过攞到奖。」
愿意为角色剃光头
跟TVB快将约满，Rainky承认公司有搵她倾，《灵》剧反应好亦令她心态有转变，「始终呢个平台由我入行到𠵱家都畀咗好多机会我，令观众认识我，留返喺度发展或者离开，都唔会放弃拍戏同唱歌。」Rainky好想挑战自己，愿意为角色牺牲，「我唔介意为有癌症嘅角色剃光头。」不过她亦明白，今次可能只是虚火，「大家呢刻锺意，可能3个月热潮就过咗，要睇一个人努力需要好长时间，有啲人好好彩一套戏或者一只歌去到某个位，我系要浸返嚟，观众对号入座，先天外表觉得我系咩类型嘅人。」
2019年6月，Rainky与小学同学杨晓婷合资近百万元建立品牌「ScR sincera」，售卖女性保健用品，生意愈做愈大更开埋美容院，年前与家人搬入小榄逾2500尺的独立屋，由于她曾上载会所露天泳池取景拍摄的性感相，被口痕网友指忽然富贵，全因有位马来西亚籍「富二代」郑姓旧爱，对被老屈靠男人发达兼影响到家人，Rainky嬲到即搵律师出声明以正视听，「一定要否认就系话我屋企所有物业，或者我所有嘢，我细佬架车，都系嗰个人，我要同屋企人平反，妈咪爹哋见到唔开心，亲戚会问点解个女会俾人咁讲，点解将呢啲嘢对号入座晒呢？！出咗声明有人信有人唔信，我会用时间证明畀大家睇！」
Rainky又怒斥现在网媒歪风，见到网上传闻冇尽传媒责任去求证，只识得一间抄一间，「冇任何记者访问过我系定唔系，跟住一间出咗copy 第二间、第三间，跟住网络就疯传，嗰时又疫情，好少公开活动又搞紧生意冇人问到我，啱啱呢个剧出咗，我就可以讲返事实。」她承认曾为假新闻唔开心，但现在已学识睇开啲，「有谷鬼气，但最紧要自己生活得好，唔好理人哋讲咩。」
唔乱打针怕变胶面
Rainky作为美容生意老板娘，被形容外形「进化」不怒反笑，「唔介意，我做医学美容生意，梗系会打吓针啦！同埋我真系好努力做运动，令到皮肤唔会下垂。但我都唔赞成开刀，好大风险。」问到打针部位，她就笑言，「呢个就唔讲嘞，你嚟我美容院话你听，商业秘密，哈哈！全部我要打嘅地方都会打，唔应该打嘅地方唔会打，因为唔想块面系胶同硬罗！有时打针唔系微调或者加工，打保湿针好似一次过敷咗10块面膜，我系将20岁样貌保养落嚟，但唔好over罗！」
快将30岁的Rainky，有钱有样有身材，拍拖次数竟然一只手数得晒，早前了解过一个男仔但发现性格不合，「都希望有个对的人出现，系长远关系，唔好再寻寻觅觅，交个心出嚟又要裂开，好攰呀！」问到择偶条件？她坦认同细个好唔同，「以前想拣啲好叻，好有背景或者帮到我，𠵱家反而想要简单啲，我锺意fashion boy，有潮流触觉，最好有少少艺术细胞，锺意音乐，一定要做运动。」至于对象使唔使好有钱？「男仔做返男仔嘅责任就得，唔使一定要好奢华嘅生活。」
Rainky又兴奋透露跟偶像周杰伦旗下的上巿公司「巨星传奇」合作推出瘦面机，更期待生意可冲出香港，不过暂时仍未有机会见到偶像，「唔需要见佢，佢幕后咁大个团队，我反而希望可以同佢合作音乐，哈哈！」生意愈发愈大，问会否希望有日可上巿，她竟然话：「咁样好攰，女仔唔好咁叻，我都希望拍到拖，哈哈！」
《星岛头条》新网站有更多精彩内容：http://www.stheadline.com/
最新回应