独家丨48岁姚安娜笑谈负评：能变老唔系必然一碟歌手参加《中年2》被踩发福走样

2023-07-26 07:00

26年前，拥有一把如王菲的声线，以艺名姚琇龄推出专辑的姚安娜(Anna)，最近以电影《小丑》造型出战《中年好声音2》海选，被网民取笑发福兼走样，又唔抵得她住九肚山，闹爆她咁富贵仲出嚟唱。作为身心灵导师的她笑对负评，「刺激到佢哋咁肉紧我，都几好呀！」她认同在香港生活压力大，但人生就要不停挑战苦难，更奉劝大家，「做人唔好咁执着，活著就会有价值，否则无力感只会逼死自己。」采访：方骞平场地：将军澳Fleur

48岁的Anna参加《中年2》唔系要收复失地，只系为咗玩，做令自己开心嘅事。

Anna只想做自己想做嘅嘢。

强调几十岁再冇歌星梦。

Anna系个开心快活人。

老公及囡囡真心欣赏佢，齐齐畀个叻Anna。

姚安娜于22岁出过专辑，歌手命只有9个月，做完一碟歌手后转做「神婆」，在塔罗牌占卜及通灵界杀出血路，近年开小店卖手作沐浴产品。48岁的靓妈以一身幸福肥出战《中年2》，海选时穿上红色小丑装战衣，压低把声跳唱张国荣的《恋爱交叉》，她选择用小丑嘅黑色幽默来娱乐大家，表达一念天堂一念地狱。

22岁时与丘采桦齐出过《2 in One》专辑。

歌手时代。

Anna换上小丑装扮演出，虽然台风十足，但弹多过赞。

Anna好锺意小丑角色，家中有个人咁大嘅小丑公仔。

每年万圣节姚安娜会扮小丑。

曾志伟睇到皱眉

姚安娜表演项目好有意思，但网民就唔受落，难得她面对大量负评仍然保持正能量：「香港人嘅水平都好接近，踩嘅嘢都一样，离不开『咁肥仲出嚟唱？』、『肥咗好多喎，以前好样啲』、『个头想点？着到古灵精怪』、『唔识字呀！将昙花一现讲成云花一现』甚至话『住九肚山豪宅仲出嚟唱歌？』更有趣系惹嚟阴谋论，认为着成咁系计策。」不过网民并非一面倒负评，姚安娜以慈悲形容正评，「话『既然尽咗力就畀佢入围啦』、『都想睇啲正面嘢』真系愈睇愈开心，原来佢哋好关心及在乎我，刺激到佢哋咁肉紧我，都几好呀！」姚安娜觉得呢个世代好多人抑郁，所以做啲正面嘢嚟娱乐大家。不过，她笑言曾志伟在现场睇到皱晒眉，「从眼神、身体语言表达『咩事呀？』伍仲衡评我跳舞生硬，好彩肥妈鼓励我。虽然唱得3分钟就被叮走，希望娱乐性抢分。哈...如果入到100强就证明TVB接受尺度阔咗，唔一定只系畀靓仔靓女唱歌。」

唱跳国荣的《恋爱交叉》，演出娱人娱己。

面对Anna充满娱乐性嘅演出，曾志伟睇到皱晒眉，评判肥妈就系咁忍笑。

几十岁冇明星梦

姚安娜承认海选准备不足，发挥得唔好：「唔知海选有直播，所以随意拣咗套万圣节小丑西装，喺现场见到人生百态，有参赛者喺后台爆喊，紧张气氛吓到我想调头走，但唔能够喺囡囡面前做老鼠退缩。」仍然热爱唱歌的Anna强调几十岁唔再发明星梦，因为随老公郭智明由台中回流返港，闷闷哋报名玩吓：「入到嘅咪当个天畀机会我平反罗，当年因为经理人同唱片公司抢人争斗被雪，做唔够一年歌手，老公(当时男友)睇到心噏，觉得唔应该嘥咗我，想我有更多人欣赏，所以再有机会表演，会好好珍惜Show靓声。」乐天的Anna笑言，输咗都唔会借酒消愁，「我个人好简单，最重要大家健在及开开心心，能够变老唔系必然。」

15岁时曾拍过另一部僵尸片。

1991年Anna参加《新秀》时，以黑丝造型跳唱关淑怡的《黑豹》杀入5强。

Anna主持过儿童节目《闪电传真机》。

在亚视经典剧集《我和僵尸有个约会2》演猫妖。

以前真系卜卜脆。

当年Anna虽然有啲肉地，但鬼鬼地样索到爆。

姚安娜是知名塔罗师及通灵师，拥有唔少VIP客。

期间为艺术保持演出。

老公郭智明、大女Celeste及细仔James力撑她参赛。

叹港人压力太大

曾居住台中及澳门的Anna觉得香港百物腾贵，加上3年疫情及大环境氛围令到香港人压力好大。她认为人生系要不停挑战苦难，向前行尽量正面面对，活著就会有价值，并奉劝做人唔好咁执著：「我哋能力有限，只能过好今日，保持今日嘅乐观去迎接机遇，否则无力感只会逼死自己。」她强调自己绝不有钱，都会有经济压力，只不过疫情回流又要适应新环境，才花上6万港元，月租九肚山低密度新楼盘来抗疫，落脚一年，短期内会搬往将军澳细单位，未来会迁移广州南沙区发展。