独家丨王馨平心痛遗憾一提王羽即喊新歌讲疏离父女情后悔冇主动示爱

2023-07-25 07:00

王馨平（Linda）近月多搞作，包括推出以父女情为主题的新歌《威严背后》，又宣布9月举行《女人馨情演唱会2023》（香港站），两个计划早想实行，无奈疫情影响一拖再拖。提到去年病逝的父亲王羽，Linda坦认关系一直疏离，又嫌父亲罗唆，长大了才觉悟，「有时咪俾佢烦吓，佢会舒服啲。」提到遗憾事，她忍不住落泪表示应主动向父亲示爱，就算拖一拖也好，「想讲嘅时候佢已经瞓喺病牀。」采访：杜杜摄影：朱伟彦化妆:MOD – Crystal 场地: 本地舞台

Linda直言若王羽听到新歌一定唔锺意，「佢一定会话，做咩写呢啲出嚟畀人听。」

因疫情关系，上月中Linda才在伍仲衡监制下正式为新歌录音。

Linda早前为《女人馨情演唱会》（香港站）拍摄宣传海报。

Linda搵来伍仲衡制作新歌，歌词依照她跟父亲的关系而写，当中提到「家中的他如领袖」，她称父亲绝对是严父，而「当天一巴的掌手」，就是讲她17岁被父亲掴了一巴，「读高中时初恋俾佢知道咗，佢好唔高兴就掴咗我一巴，『点解唔好好读书谈咩恋爱』，之后透过后母话畀我听，佢好伤心好后悔打咗我一巴，我嗰时梗系嬲啦，puppy love之嘛，又唔系去抢钱打劫，做啲伤天害理嘅事，做咩要打我呢！？」当然现在她明白，父亲只是太紧张她而一时冲动，之后亦冇再打过她。

Linda新歌提到17岁时，被父亲发现拍拖遭掌掴。

老年王羽怕咗个女

Linda认为父亲是个传统中国男人，不擅于表达如何爱一个人，「我做歌手，佢从来冇赞过我，冇话过我唱歌或者边只歌好听。」但她从很多人口中得知父亲的另一面，「有间餐厅老板系爹哋朋友，佢话我听，『你知唔知你爹哋好着紧你㗎，佢嚟餐厅见到你啲poster，问我仲有冇多几张，佢想收埋，仲好珍贵咁卷起攞返屋企』，喺人哋口中先知佢咁着紧我。」另外，Linda当年因为跟甄妮的合约纠纷在台湾打官司，王羽一直默默支持爱女，「我喺台北出法院，佢每次都会陪住我，好多事情你谂返就会明，原来佢心入面好爱我。」

王羽和林翠婚后育有3名女儿，Linda为长女。

Linda跟父亲关系亦逐渐转好，因她长大了更懂得体谅对方，「以前尽量唔好见，真系怕佢，同埋有时又嫌佢罗唆，以前唔识谂，其实真系唔使入心，有时咪俾佢烦吓，佢会舒服啲。」到王羽晚年身体转差，两人关系甚至有点对调，「慢慢佢开始会怕我𠻹！因为我会开始管佢，唔好成日喺出面同人饮酒饮咁多，唔好再乾杯啦！」

Linda直言若王羽听到新歌一定唔锺意，「佢一定会话，做咩写呢啲出嚟畀人听。」

开骚分享爱情经历

Linda制作新歌就是希望透过音乐令大家反思，要如何珍惜身边人，她边讲边喊：「我觉得做仔女可以将心比心，有时候个心放大啲，要知道爹哋妈咪唔会成日喺身边，同屋企人有咩唔开心，要识得调整自己心态，唔会有遗憾。」她承认好有感触，因为跟父亲相处有遗憾，「好多嘢冇讲出嚟，想讲嘅时候佢已经瞓喺病牀，唔知佢听唔听到，明唔明。」问到如果可以重来一次，她会怎样？「会主动拖一拖佢嘅手。」

Linda提到跟父亲相处有不少遗憾，即哭成泪人。

Linda早于疫情前已想搞演唱会，因早在2017年已举行两场《女人馨情演唱会》上海站，但一直受场地所限未能开香港站，「呢个时候申请场地要等到出年，好彩两个月前有人放9月期出嚟，问我做唔做，我觉得都系时候。」歌单方面，Linda除了演绎代表作，还会分享爱情经历，「演唱会叫『馨情』国语解作女人深情嘅意思，我都应该有资格同大家倾吓人生历练，带一啲未必系我嘅歌畀大家。」她又强调仍然视唱歌为事业，会keep住制作音乐，「我系认真嘅，锺意唱歌先入行，会谂返个初心，同埋觉得自己都仲可以唱多一段时间，哈哈！」