独家丨谢君豪教演夫妻搵返初心：有啲嘢老奉㗎啦郑中基邀任《机动兵工厂》导师　

2023-07-24 07:00

郑中基（Ronald）为庆祝主理的网台「机动娱乐」成立3周年，特别举办《机动兵工厂》招募对演戏有兴趣及热诚的演员，经过多位星级嘉宾指导及拣选后，胜出者将成为网台合约艺人。最新一集有入行超过30年的影帝谢君豪任导师，好锺意教学生的他觉得指导后辈之馀，又可以令自己搵返初心，「有啲嘢以为做咗咁多年，老奉㗎啦！其实唔系，最基本嘅嘢先系最重要。」采访：杜杜摄影：朱伟彦

豪哥和Ronald都认为好多新生代演员都好用心学习，只是未够经验。

《机动兵工厂》已邀请了杨伟伦（阿卵）、虾头（杨诗敏）、周恩恩（配音导演）、陈茂贤（著名编剧及《不日成婚》导演）、梁雍婷及汤骏业出任导师。今次轮到经验更丰富的谢君豪，拍摄当日是他首次见到6位学员超酸、阿杰、米奇、Edwin、何求及Wade，为了快速认识他们方便教导，甫到场即以一招「扮傻」来了解学员，「我喺化妆间偷听佢哋讲嘢，唔出声「诈谛」食嘢，大概知道佢哋个人点样，啲关系点样。」

豪哥为了加快认识学员超酸（下右二）、阿杰（下右一）、米奇（上右一）、Edwin（下左二）、何求（上左一）及Wade（下左一），出动到偷听这一招。

做戏最紧要准备工夫

偷听完学员相处，豪哥再偷睇埋他们对戏，他跟Ronald在镜头后睇米奇和何求，拍摄一场夫妻在家相处戏份，两人边睇边笑，因两位学员表演得非常怕丑，完全唔似一对夫妻。豪哥笑言：「佢哋私底下好熟，但唔知点样演夫妻，好怕丑唔识放松，拥抱都有少少唔习惯。」豪哥强调除了跟对手熟识，亦要增加对布景的熟识度，「嗰个景其实系佢哋屋企，开头佢哋都唔系好习惯，好似都唔知系佢哋屋企咁，好陌生，应该要好熟，边个坐边度应该有晒默契。」他和Ronald拉埋两个学员一齐睇playback兼畀意见，「记住戏唔可以断，自己喺个脑度过一次。」

豪哥和Ronald在镜头后观察学员表现。

豪哥和Ronald发觉有好多问题，即拉埋学员一齐睇playback从旁指正。

既然表现未达标，豪哥即落场指导，连夫妻间的亲昵举动都示范一次，经豪哥指正后学员明显有进步，令他好开心，「唔会一定做到识飞咁，但呢个第一次可以畀佢哋累积经验，一日里面真系睇到啲成果，学员由唔系好熟演戏，再对个布景建立咗感情，对佢哋嚟讲系好好经验，做戏要同身边对手好熟，同剧本好熟，同环境要好熟，如果唔系无从投入，除非好有经验，一埋位就得，但唔系咁多呢啲人，开头要做好多准备工夫，呢啲就系准备工夫。」

豪哥示范点样做亲热戏份，学员好留心听讲。

女学员米奇和何求经豪哥指导后，演起夫妻自然得多。

做老师可以教学相长

豪哥和Ronald见学员做得开始似样都好满意，两人异口同声话：「演兄弟、夫妻、父子嗰啲一定要主动啲去沟通。」豪哥见到学员进步最有满足感，「剧本又唔熟，自然会用好多假动作掩饰自己嘅忘记，哈哈！假动作自然好假，佢又知做得假喎，就会做得唔好，但慢慢熟咗，佢哋已经记得晒啲对白，亦都信任对手，就会好放心，愈做愈好。」年前曾在浸会大学出任戏剧导师的豪哥愈讲愈兴奋，坦认好锺意执教鞭，「畀我最大感受唔系我教人，系讲返畀自己听，温故知新，有啲嘢以为做咗咁多年，老奉㗎啦！其实唔系，最基本嘅嘢先系最重要。就系呢四个字教学相长，我哋忽略咗好多最基本嘅嘢，原来呢啲先至系最重要，呢个就系初心。」

豪哥除了教戏，还跟学员分享多年工作经验。

拍摄完毕，学员仍拉住豪哥问功课，他亦乐于解答。

既然豪哥锺意教，Ronald都好想他再上节目同学员分享，但大呻有难度，「佢好忙呀！哈哈！你知佢一路开紧工，日夜颠倒会好攰，豪哥真系好好，抽咗差唔多半日畀我哋去教学员，真系好多谢佢。」君豪答：「唔好咁讲，我自己都enjoy㗎嘛！」身为「厂长」的Ronald即刻安乐晒，「咁就好啦！」又称睇见学员有好成绩特别开心，「上一堂有其他导师未熟学员，睇唔到佢哋有任何进步，但当我讲畀佢哋听每个学员最初系点，啲导师就话冇呀！头先睇佢哋冇你讲嘅问题喎！」豪哥认同：「即系佢哋进步咗罗！」Ronald好满意：「起码佢哋袋到啲嘢走，点都学到啲嘢，一定会有用嘅。」Ronald预告下周将是学员「终极一战」，更搵来吴君如和导演庄文强做嘉宾，选出最后胜出的学员，「最尾系会签一个，𠵱家睇嚟好难拣，留返畀嗰晚啲评判。」豪哥即笑Ronald，「将个波交畀佢哋，哈哈！六个拣一个都难呀！」