独家丨李日朗入行20年受尽委屈:食死猫哑忍多年传为情癫咗翻唱《傻女》兼被骗300万

2023-07-17 07:00

离开TVB 15年的李日朗（Don）去年初回巢，客串过几集《法言人》，在《轻功》中演冇角色名的富家子，终于等到在新剧《灵戏逼人》演大奸角，戏份又多又有发挥。今年是李日朗入行20周年，冇大红过但有人识，半红不黑受过唔少委屈，最嬲当年翻唱哭腔版《傻女》，竟被指求爱不遂(蒋雅文)癫咗，又试过投资被骗去300多万，不过有手有脚总搵到出路，早前他便考到牌成为日式小颜术师开拓新天地。采访：方骞平场地：小小堂

Don在娱乐圈20年感恩冇饿死，就算曾经冇晒钱都搵到生存方法。

李日朗好用心做好每份工作。

Don做人好正能量，有乜委屈好快唔记得。

Don感恩20年来有好多前辈扶过他。

就算系「散打工」，20年来冇被淘汰，证明仲有生存价值。

新剧《灵戏逼人》中李日朗先陷害张振朗抄歌，再𠱁蔚雨芯上牀，奸到出汁，他唔怕影响形象，笑说：「𠵱家啲人睇电视剧会放松咗，如果咁样令到观众讨厌我，证明我演技好ok，唔使做小颜术师啦。」他形容跟蔚雨芯嘅牀戏好皮毛，远远不及电影《性工作者十日谈》，片中做变性人妓女跟邓健泓有湿吻；另《踏血寻梅》演「四眼济」嫖客，跟女主角春夏由牀做到去浴缸，仲第一次露股演出。

新剧《灵戏逼人》中做大奸角，𠱁蔚雨芯上牀露出奸狡眼神。

新剧演渣男角色。

剧中个样好衰。

虽然戏份唔多，但获唔少观众赞演得好。

李日朗唔怕做奸角影响形象。

Don胜在冇形象包袱。

现实中Don却系暖男。

去年初Don回巢，客串过几集《法言人》。

剧中重遇前辈黎耀祥。

Don肯豁出去，真系几好戏。

2007年在电影《性工作者十日谈》演变性人妓女，跟邓健泓有赤裸牀戏。

2015年拍《踏血寻梅》演嫖客，跟春夏有激烈亲热戏。

衰心软被骗300万

20年来，李日朗受过唔少委屈难于启齿，「当年得21岁，做『细』嘅有咩事都会推落我度，冇办法喎只得食死猫哑忍…」2015年，他重新演绎陈慧娴经典金曲《傻女》，虽然劲Hit有50多万点击，但遭全城狂笑，指他受唔住蒋雅文婚讯刺激才唱得声嘶力竭，更直指他求爱不遂癫咗，令他相当难受。事隔8年李日朗依然放唔低呢个心结：「好记得当年一瞓醒见到海量评论，但98%系负评，话我为情黐咗线，做音乐乱嚟，直至后期有音乐人挺身讲返两句，赞首歌有可听性；亦有失恋嘅听完话得到共鸣。」当年他自资6位数推出翻唱专辑《Fly Me To The Earth》是想做睇得见的音乐，「听到啲歌脑海中自然浮现出唱歌环境及情景，如同百老汇歌剧，可惜被扭曲，辜负咗参与嘅前辈心血，仲累到佢哋俾人笑真系唔好意思，只碟其实受发烧碟迷力捧，亦系我销量最好嘅一张专辑，𠵱家得返几十只喺我屋企珍藏。」

8年前，Don以哭腔唱出《傻女》，换来网民狂插。

Don及蒋雅文曾组情侣档「Don & Mandy」发展而传出绯闻，后来不欢而散。

李日朗做过哥哥纪念音乐会。

Don一身昔日哥哥造型，和郑中基在纪念张国荣演唱会上演出。

2018年，李日朗作多方面投资，惨被相熟生意合夥人骗去300多万，包含家人的血汗钱，搞到一铺清袋：「最惨当中50万用嚟拍电影《铁璧男之拳》，对方话屋企有人患病要急用，一去冇回头，因为冇咗50万，资金变得紧拙，拍摄被迫延期，至2019年开始疫情，《铁》片上映唔到变Total loss令血本无归，只怪自己又蠢又心软，系一次重大教训。」问到有冇试过追数?他笑言「警都报埋」，最终当然追唔到，

2019年由他执导的电影《铁璧男之拳》，因为被骗去50万资金影响拍摄进度，最后胎死腹中。

Don将现实中玩唔到嘅元素放晒落片中。

转型小颜师狂吸金

自问尽力做好每个Job的李日朗乐于被封娱圈「散打王」，「就算系『散打』都有咁多人记得我，都OK呀，呢20年由幕前做到幕后，由歌手进化到自资出唱片，2009年至2016年放弃香港市场去北京发展，咁勇敢都畀个赞自己，经历令自己成长咗好多，感恩遇上每位好前辈，每个阶段上天都赐我打不死嘅运气。」目前主力经营小颜术师的他，靠一门专业手艺，生意愈做愈好，更开心晒命是20年来搵得最多。问到成功转型，系咪已冚熄咗演艺团火？他坦认而且有不舍：「女友黄静蓝都支持我，最紧要做得开心及有满足感，帮人重拾自信。𠵱家真系冇乜时间静落嚟谂创作，情况好似打边炉滚咗要收慢个火，等肚饿时再开火烚过。」