独家丨陈晓东毒男变万人迷励志回忆录出新歌勾起陈年招积媾女史

2023-07-13 07:00

47岁陈晓东（东东）推出新歌《烧光了火柴》，是2002年亲自作曲的《划火柴》延续篇，MV蓝本取材自1997年其主演的电影《初恋无限Touch》，除勾起Fans当年追星回忆，亦令东东回想自己由怕丑仔变歌手的经过，原来当年签约首间唱片公司，他只答咗3条问题便顺利出道。访问由讲新歌变咗东东回忆录，当事人愈讲愈多，除自爆发育时期太瘦要饮肥仔水，更大讲招积情史，连阵年初恋女友都唔放过。采访：杜杜摄影：朱伟彦场地:九龙海逸君绰酒店

东东讲起跟初恋女友讲电话情况，风骚又sweet。

东东指香港观众对他印象仍停留在青春片，都想拍适合他这阶段的港产片。

东东一直冇打算做任何歌的延续版，因怕效果不似预期，但见到《烧》歌词就改变主意，他开心歌曲反应好，而且MV亦引起不少回响，他称歌曲有回顾含意，导演提议加入以往片段，「导演系套戏Big Fans，佢将电影剪咗个MV，跟住呢个蓝本拍摄。」MV邀请两位年青演员任主角，令东东想起不少拍戏点滴，「最深刻第一次拍恋爱嘅戏，真系用返自己初恋时一啲小习惯，如倾电话唔想讲bye bye，讲咗10分钟你bye先定我bye先，又喺地铁捣乱，好似马骝咁喺碌柱度揈嚟揈去，攞我真实经历去演。」

东东制作及宣传新歌《烧光了火柴》，令他回忆好多青春时光。

东东亲自拣《烧》MV的男女主角，亦有向他们教路。

《烧》MV以《初恋无限Touch》作蓝本，两代男女主角确有几分似。

变万人迷全靠阿妈果断

东东自称初中时只是一名唔起眼的薯仔，「中学前期唔受欢迎，戴住副厚厚眼镜，又瘦骨仙咁，试过太瘦食过肥仔水，哈哈！」但暗恋失败反成他变万人迷契机，「阿妈觉得搞错呀？为咗呢粒骰咁伤心，即刻带我去电发分返条界，配埋Contact lens，哗！一分咗界配埋隐形眼镜，熨直咗校服，哈哈！突然间打开咗个巿场，几丰盛呀！几受欢迎，（女仔）围埋嚟同我倾偈，问我星期六得唔得闲。」

东东跟妈咪关系一直很好，失恋或想做歌手都会坦白跟她讲。

突然多女埋身的东东风骚分享初恋情史，「知佢锺意我，佢又知我锺意佢，对方写咗封信畀我，但我又好衰。（因为多人争？）系罗！嚣张咗，中五放小息，哗，咁肉麻嘅，当众喺操场大声读佢封信出嚟。」虽然个女仔都有跟东东拍拖，但最终都是分手收场，「都系为了学业，为了不羁理想，迫于掉低这份爱（《流离所爱》歌词），哈哈！老老土土嗰啲。」东东话自己衰但重情义，仍Keep住细个收的情信。问到初恋女友外形，他说跟太太王妤娴都是眼大大的长发美女，「我属于奄尖嘅人，都有少少外貌协会，锺意乖啲斯文啲，可爱啲得意啲。」

东东拣对象多年不变，太太王妤娴都是眼大长发美女。

做家庭聚会歌手练大胆

问到人生中最深刻记忆，东东首推签约首间唱片公司（宝丽金）的情景，当年签约时只得17岁，中学还未毕业。「唱片公司问咗我3个问题咋！锺唔锺意唱歌？锺意。锺唔锺意我哋公司？锺意。签畀我哋好唔好呀？好呀！哈哈！从此就打开咗我嘅天空！」小时候曾是合唱团成员的东东非常怕丑，一直只敢偷偷在冲凉时唱歌，「最记得要考小学，喺英文老师面前开声考唱歌，第一句已尴尬到食咗10嚿酸梅咁，听到自己把声毛管戙。」全靠卡拉OK令他转变，加上有家人「支持」，「嗰时好兴KTV，我系屋企聚会嘅驻唱歌手，有人同我老窦讲，『你唱得麻麻咋喎，但你个仔唱得好过你好多』哈哈！嗰时我15、6岁，唱啲经典广东歌、国语歌，逢亲有家庭聚会都会出嚟表演。」

东东小时候是怕丑仔，很难想像自己长大会成为艺人。

东东中学未毕业便跟已故的戴思聪（左二）学唱歌，靠对方引荐签唱片公司。

东东愈唱愈认真，慢慢对入行产生兴趣，「我喺KTV练歌可以唱足12个钟，跟住真系去训练（跟戴思聪老师学唱歌）。」有入行谂头的东东即同妈咪讲，「记得我哋喺街食紧河粉，佢第一个反应系『吓，你呀』，对我好冇信心，佢话你谂住参赛咩，我话我冇谂住参赛喎，佢话咁你点入行，我话我识咗个老师，老师有啲偏心我，带我去见唱片公司。」成功签公司的东东，1995年正式出道。