星8卦｜「哥仔」捱足几年北上搵真银睇通市场价值挞订不回港

2023-07-11 11:00

呢个世界乜嘢都系自己拣，啱同错唔到最后无人会知。要好似「哥仔」咁坚持，又真系无几人，抵佢依家财来得易，死都唔放弃眼前嘅机会。

早几年因为一啲机会，「哥仔」无端端俾人归类，乜嘢前途都无晒，好彩有大公司帮手疏通，佢就默默承受住种种冷嘲热讽，希望等到洗底嗰一日。等足几年，「哥仔」至有机会北上，佢亦唔敢行差踏错，初时由超级四、五线做起，跑综艺收两、三万一集，但佢唔计较，总好过坐食山崩，依家升咗10倍价钱，可以30万人仔一集，「哥仔」直情觉得自己行大运，搵到就存落银行，唔敢乱Fing。

好似大公司见佢捞得掂，梗系希望佢回巢拍番剧集或节目，一家便宜两家着，但「哥仔」一而再推job，成日话自己唔得闲，无非系要专心，明白唔好好似「师兄」发咗达又希望祖家接受，结果两面唔讨好。最估唔到「哥仔」本嚟谂住返屋企开演唱，期都攞埋，但左度右度，惊自己顺得哥情失嫂意，又怕自己企错位，而且喺上面唱两只歌已经系一场演唱会嘅歌酬，所以索性挞订，无谓搞咁多事端，坚持留守己经经营嘅市场！