独家丨嘉盈霸气回应凭够胆自爆黑历史出靓相散文集遭连登仔质疑冇资格

2023-07-07 07:00

近年经常现身ViuTV节目，拥33E好身材的网台「熊仔头」成员嘉盈（王嘉盈），唔只捞埋电影，今年书展更会推出首本图文并茂散文集《KAYING’s Wordings》，自认才疏学浅的她无意做才女，只想跟Fans分享感受，及畀自己留个纪念。书中敢言性格不变，但性感相欠奉，原来作风大胆的她都有嘢惊，但此举就令网民相当失望。采访：杜杜摄影：罗安强

嘉盈首次跟粉丝聚会只有50个筹，但都担心冇人排队。

因去年有出版社邀约，25岁的嘉盈好想试新嘢而答应，「我有两个IG account，大嗰个有超过28万人follow，细嘅得4万几人，所以有时心情唔好，好放心喊住打一堆嘢上去，出版社觉得啲随笔几得意，就搵我将呢个概念摆落书。」她强调并非想走才女路线，「朋友share时话我系才女，真系尴尬到渐冻症，老实讲我真系才疏学浅，我见连登有人问我凭咩出书，凭我够胆攞自己嘢出嚟讲，讲自己以前好锺意讲大话。」

嘉盈平时最爱在这个IG讲真心话，亦成为今次出书的契机。

嘉盈在书中分享对事物看法，譬如如何爱自己。

嘉盈在书中分享对事物看法。

自制小礼物赠Fans

向来大方劲锺意在IG分享性感靓相的嘉盈，今次出书竟走保守路线，她解释：「唔想递畀阿爸阿妈时尴尬，同埋睇返转头唔想有后悔感觉。」因未知仲有冇下次，自资近10万的嘉盈可谓不计成本，「宁愿贵少少，可以印得好啲，大家睇晒之后都有花瓶嘅作用。」至于销情她并不担心，「卖唔卖得都好，唔需要有畅销呢个title，我都唔系写书嘅人，只系送畀Fans嘅礼物，一个纪念。」

嘉盈IG内有大量喷血度极高的三点式照。

书中仍有着deep V大晒事业线的靓相。

书中的造型都由嘉盈亲自设计，再搵摄影师拍摄。

一向喜欢复古造型的嘉盈，新书中当然唔少得。

将于书展举行签书会的嘉盈尴尬多过兴奋，「觉得凭咩出嚟同佢哋聚会，仲要揸住支咪同佢哋讲嘢。」除了签名和合照，宠粉的她还准备自制小礼物送畀Fans，但就未决定当日衣著，「我着衫好睇心情，唔会因为要同观众近距离就包到实，最紧要靓。」而她亦唔担心有疯狂粉丝埋身，「我有个光头经理人顶一顶，如果有啲疯狂粉丝太有侵略性，我会严厉斥责，对Fans唔会斋呵，觉得唔啱会讲。」