独家丨尹光提醒姜涛找数期待合唱《你阿妈大减价》 「AI尹光」带挈爆红开心追黄鸭

近日「AI尹光」Cover姜涛的《Dear My Friend,》及林家谦《一人之境》等歌曲成为全城热话，带挈74岁的尹光被封「光B」，网民齐赞「AI尹光」为歌曲注入灵魂，连原唱都话好好听。人老心不老的正版尹光，表示愿意跟任何后生歌手Crossover。另外，对于姜涛有兴趣邀他任个唱嘉宾，中环拍宣传片同时追黄鸭的「光B」提醒姜涛记得找数，更想跟他齐唱《你阿妈大减价》，「佢系一线歌星咁出名，我呢啲中游嘅，梗系要抽水upgrade自己啦。」采访：方骞平 摄影：谭志光

尹光人老心不老，跟贴潮流追黄鸭。

变身大忙人的尹光成为传媒焦点，本周三(14日)下午，他于中环摩天轮拍新歌《掂》宣传片，《星岛头条》记者现场测试光哥人气，见他由中环码头行到IFC，沿途都被年轻男女偷影，甚至求合照，最搞笑有位大叔笑晒口说：「我梗系识佢，『庙街歌王』嘛…」语毕唱出《我向你求婚》，见惯世面嘅尹光温柔更正：「呢首系罗家英嘅歌。」好彩大叔都过到关唱返啱尹光啲歌。

连后生女都like尹光，「光B」呢期好红。

自认系尹光Fans嘅大叔，竟唱错《我向你求婚》。

后生仔都要「集邮」。

姜涛唱歌好温柔好好听

因为「AI尹光」，尹光被封「光B」跟「姜B」(姜涛)睇齐，「光B」唔觉自己Hit咗，工作亦冇特别增加：「本身都唔知乜嘢叫AI，听完『AI尹光』啲歌觉得几得意及好笑，有啲似少少我粤曲腔口。」对于姜涛大赞「AI尹光」唱得好过他，尹光话冇可能：「咁出名嘅歌星，有咁多『姜糖』，又系原唱者点会唱得唔好听呀？我听返原曲，原来佢唱歌好温柔，唱得好好听。」他认为姜涛咁讲系尊重前辈：「正如搵第二个唱我嘅《荷里活》、《少理阿爸》梗系冇我咁好啦。」问到会否向姜涛宣战，挑战《Dear My Friend,》？光哥即说：「如果佢咁畀面我，真系『找数』请我做佢个唱嘉宾，我就为佢而唱，大家一齐唱吓。」光哥更想姜涛唱返佢嘅首本名曲《荷里活》、《你阿妈大减价》，但担心对方有偶包被拒：「我形象搞笑，但佢咁斯文唔知肯唔肯唱呢？」

有网民将尹光过去演出片段，结合AI尹光把声「翻唱」姜涛歌曲《Dear My Friend,》。

年轻时的尹光，成为AI尹光Cover杨千嬅的《可惜我是水瓶座》歌曲封面图。

AI尹光翻唱《一人之境》点击已超过79万次，张敬轩好锺意，仲话一瞓醒就要听。

近日网上出现「AI尹光」系列成为传媒焦点，光哥搞鬼留言，有时悲有时喜，有时刀仔拮大髀，都系做返我自己。

 

想拎最令香港人开心奖

尹光自言就算推job都会优先mark期畀姜涛：「因为佢真系出名，要抽佢多少水，upgrade吓自己啦。」光哥眼中嘅姜涛属一线歌星，而他只系处于中游位置，唱咗53年歌算对自己有个交代：「唱到今时今日唔系为搵食，因为锺意唱歌，唔敢讲系劲，我呢个年纪希望Keep住健康，一路唱歌畀大家听，下月仲做粤剧演唱会。」有心有力的光哥唔知自己有冇资格角逐乐坛奖项，但有奖畀佢一定会攞，笑言：「真系有会开心，点解唔要？(乐坛欠你一个奖项交代?)哈…可以咁讲啦，咁我都攞过『钻石真歌手奖』，通常情歌获奖，唔轮到我呢啲唱警世歌及反映社会现实嘅歌星，畀个《最令香港人开心歌曲奖》都好呀！」

尹光提姜涛「找数」，请他做8月个唱嘉宾。

希望同后生歌手Crossover

尹光经验之谈，寄语年青歌手唔好偷懒扮死，记住「天下无难事，只怕有心人」，所以新歌《掂》都系提醒年青人要发奋，唔好怕辛苦：「以前屋企人喺越南开戏院，家境富裕，直至70年代只身嚟香港辛苦咗多年，尤其要苦练国语歌。」对于姜涛经常被取笑肥仔都属小事，尹光仲撑姜涛：「肥瘦冇所谓，最重要健康，𠵱家好多人肥，我喺1993年做《帝女花》时更肥啦，当时人人都笑我，咪由人笑罗。」另外，光哥跟保锜合作后感过瘾，有见新一代歌手各有长处，决定由𠵱家开始来者不拒，乐意同任何年青歌手Crossover，提醒完姜涛找数，仲记得轩仔，「如果张敬轩同我合作做骚，我哋会合唱《酷爱》。」

ViuTV节目《MM730 - Auntie 你好》中，尹光同保锜搞笑合唱《少理阿爸》！

尹光新歌《掂》叫人努力向上，唔好hea。

轩仔在台上邀请尹光齐开骚。

尹光应邀欣赏《Revisit张敬轩演唱会》，

尹光红极一时，2009年曾创下1年开3次演唱会纪录，当年尹光以不同造型登场。

立刻点击投票👉🏻https://tinyurl.com/38dfzwtv

《星岛头条》APP经已推出最新版本，请立即更新，浏览更精彩内容：https://bit.ly/3yLrgYZ