独家丨1号王锋无惧被狙击想做Anson Lo 2.0 《造星V》99号KC获全民睇好预大热倒灶

2023-06-16 07:00

《全民造星V》本周进入40强，早前《头条日报》率先爆出十强名单，1号王锋及99号KC（黄家灏）均大热入围。今次搵嚟两位大热门加甚有观众缘，「U21」（21岁以下）的21号瑞铭、79号Kakit和96号乐庭，还有澳门网红81号Jason Loi，以及跳姣舞超好睇的49号Adams倾吓偈，王锋及KC更轻泄总决赛的比赛内容，而因为60强比赛被26号阿泽公开投诉乱改舞步的王锋好有抱负，讲到明想做Anson Lo 2.0，不过佢被插冇道义遭网民洗版狙击，演艺路唔易行喎。采访：杜杜摄影：孔子

王锋、KC和Adams同样是跳得之人，希望跳舞能更普及。

Kakit、乐庭和瑞铭虽然未够21岁，但三人对未来已有谂法。

成功晋身十强，26岁的王锋已计划放弃做工程师专心入行，「明星梦唔系咁易实现，返工几时都得，呢个机会只有一次，我好想向前行。」讲到三甲人选，他睇好6号Taco得亚军、KC得季军，「Taco值得被看见，KC已经好多人见到佢，季军都唔会减弱佢光芒。」至于冠军他私心想留给未能打入十强的53号乐乐，仲讲到眼湿湿，「佢好有抱负，又有实力，同埋好年轻得19岁，值得拥有更大舞台。」谈到总决赛演出，他最希望可以跟Anson Lo同台，「佢出名跳唱劲，我擅长跳舞，唱歌仲要不断学习。」王锋坦认想跟AL步伐走跳唱路线，「第一步一定系跳唱歌手，之后再拍剧，但攞到叱咤新人奖先。」最终他希望开舞蹈学校，令跳舞更加普及。

王锋获粉丝自发组成约300人的「小蜜锋」支持。

20岁有把靓声的53号乐乐（罗乐），王锋睇好夺冠，可惜未能入十强。

赞女友WinWin帮得手

25岁的KC甫参赛已因WinWin男友身份受注目，但他否认「半边仔」有着数，亦笑言「WinWin男朋友」已成为他名字，但他完全唔介意，「好开心大家透过我哋嘅表演或作品，留意到WinWin再留意到我。」他指WinWin不但是头号粉丝兼啦啦队，还有功能，「玩比赛好容易当局者迷，佢无论系经验或者局外人都会畀到意见我。」讲到十强演出，他最初搞笑话想跟参赛号码同是99号的姜涛同台，「我哋砌个9999出嚟，哈哈！」当然真心想跟WinWin合作，「好想同我哋舞团一齐去经历，唱歌就要再谂。」今次访问的其馀6位参赛者都贴KC是三甲，他对被睇好笑言大家都唔想谂。「咁我更加唔会系冠军，个个都觉得会赢，唔使投我跟住就冇票。」而他心目中冠军是35号Tsoul、亚军王锋、季军32号亨仔，「好想睇到纯跳舞嘅人攞到冠军，Tsoul入到十强斋跳唔唱歌都得，炸爆晒香港人；欣赏亨仔性格温纯，有好强声音同体魄；王锋跳得又唱得。」KC想入行另有目的，「希望用Artist身份出啲纯跳舞嘅嘢，但我知唔急得，最终都系想跳舞再普及啲。」

KC的TG Group约有1100个Fans，对于团名仍心大心细。

KC希望决赛可以跟女友WinWin及舞团一齐演出。

个个都想入行做艺人

20岁的王瑞铭自知靠靓仔才能入围，未来想成为全能艺人，「我冇嘢拎到出嚟，反而令我学习更加多，可以结合做个全能艺人。」19岁的Kakit（邓家杰）生得木独，其实好搞笑，好多网民都提议他开Channel做YouTuber，他觉得未是时候，「想喺呢行打滚吓先，攞多啲资源认识多啲人，扩濶视野，5年或者10年后再run自己 Channel。」未能打入40强的陈乐庭，虽然得19岁，但好清楚自己目标，「比较适合做男团，我实力未去到好似MC咁一个发展，好锺意同夥伴去完成一样嘢，一齐奋斗嘅感觉。」讲到香港巿场能否容纳多队男团，他就认为绝对有空间，「COLLAR好厉害，Lolly Talk都唔差，舞种再难啲就会有唔同巿场。」

瑞铭的粉丝团叫「反斗奇兵团」，以他自细锺意的动画命名。

Kakit的300多人粉丝团，叫「联群杰党」，fans自称党员，他就是司令。

乐庭的粉丝团有500多人，名为「乐庭的奶酪世界」。

擅长打鼓的澳门过江龙23岁Jason Loi（雷濠权），乜都想试但会以歌手为重心，「我锺意唱歌，呢两年多咗写歌，有啲人自弹自唱，我希望可以自打自唱。」本身是YouTuber的他亦会继续拍片，「《造星V》时都有拍，想记录当刻嘅嘢，大家睇完我嘅作品系开心，甚或影响其他人。」24岁Adams（何居倬）亦下定决心做跳唱歌手，「屋企人都好支持，呢行除咗实力，际遇都好重要，要天时地利人和。」