独家丨关楚耀带笑回应「老婆」整容：我开心咪得罗跟细11年未婚妻学做悭家贴地人

2023-06-13 07:00

今年「520」，40岁关楚耀（Kelvin）向拍拖6年，前空姐兼「网红女神」Joann求婚成功，他激赞未婚妻唔重视物质生活，更改变他变得贴地。网民对准关太都好有兴趣，揶揄「女大18变」，特别想见佢真身，阿关带笑力撑：「仲提？唔好咁老土啦，我开心咪得罗。」访问期间完全feel到准人夫有几开心，老婆前老婆后称呼未婚妻，更大方分享相处甜蜜事，难怪佢话好开心可以「嫁」畀对方。采访：方骞平摄影：谭志光服装：WANAB 场地：glasshouse@ K11 Musea

因为要养家唔敢乱使钱，访问当日，阿关唔舍得食$200午餐。

40岁嘅关楚耀变得更成熟。

𠵱家成家立室大个仔喇。

(独家合照)关楚耀自称对感情一向专一，觉得能搵到一个互相信任及相爱嘅对象好难得。

Joann是前空姐。

网民认为她五官千变万化，近照同旧照完全唔同样。

阿关坚持最重要系开心。

在新剧《一舞倾城》中饰演富二代「Marco哥」的关楚耀入型入格。14年前他曾少年轻狂闯祸，经历教他成长，学会珍惜身边人和事，「好多谢公司将咁重要及立体角色畀我发挥，剧中有好多吵架戏，好有挑战。」他透露开剧前有段小插曲，因为喺香港玩越野单车受伤搞到断骨要接受手术，有谂过放弃，「老婆」（未婚妻）鼓励他唔好嘥咗机会，更陪他跛住返内地拍摄，「好彩有佢，酒店隔离期间冲凉、着衫都要『老婆』贴身照顾，开工时庄思敏、杨明等帮手拖箧。」他有感而发：「𠵱家梗系要脚踏实地生性做人啦，拍剧、唱歌、自家品牌服装生意、商演等乜都要做，难得呢个时候仲有得做，以前机会多，唔做冇所谓，嘥咗太多机会，但冇以前嘅经历唔会有𠵱家自己，否则可能继续吊儿郎当。」

《一舞倾城》中阿关和陈星妤有牀戏。

阿关饰演「Marco哥」，富二代入型入格。

《一舞倾城》中阿关饰演「Marco哥」狂媾舞女陈星妤。

阿关拍《一舞倾城》前曾炒单车受伤，幸获女友贴身照顾。

好彩伤势冇影响演出。

阿关除做幕前，仲创立自家服装品牌，亲力亲为宣传。

努力经营服装品牌生意。

预计本月会出新歌。

对上一首歌叫《树窿》。

14年前，关楚耀曾于日本闯祸。

关楚耀跟卫诗曾经共患难，最后分手收场。

戒死充坐商务位
阿关突然识谂，原来受Joann影响：「佢虽然细我11年，但女仔思想较成熟，我智商唔高，哈……所以好夹得嚟，反而喺佢身上学到简单，以前我冇钱都要充，为有型，搭飞机要坐商务位，又要好啲；𠵱家坐经济舱，将机票差价留返嚟交吓水、电、煤都好；食买会用尽coupon优惠，甚至踢拖落街，一齐食碗鱼蛋粉、行吓超市都开心。」他眼中Joann唔系「港女」只系平凡女仔：「佢冇要求我送啲乜，如果佢要求物质就唔会拣我啦，我只系畀到爱情佢，父母唔系大家想像中咁有钱，我只系一个锺意唱歌及演戏嘅普通人，好耐冇使父母钱要靠自己，尤其婚后一阔三大要搵钱养家。」

关楚耀IG内，有多张昔日坐商务位打卡相。

关楚耀变悭佬，Casual wear喺茶记食碗面都咁开心。

谭校长系阿关爸爸战友，阿伦叮嘱契仔要好好造人。

关楚耀澄清父母不是有钱人。

小时跟刘华合照。

「歌神」张学友睇住他长大。

未婚妻甜叫关伯
一提到未婚妻，关楚耀就眉飞色舞，不断同记者分享生活趣事：「我哋成日互寸，我受伤时由佢扶上扶落，佢好招积话『我最锺意帮老人家，小心啲阿关伯……』我就（幸福）话『得喇唔好嘈生晒』；平日我煮饭，佢洗碗，生活上好配合。」他又说能够遇到一个可以乜都讲嘅人，感觉好舒服，「最得意喺佢面前，我可以做返小朋友咁开心，未曾遇过一个能互相信任及相爱嘅对象，既然咁难得就要好好把握，所以『嫁』咗畀佢。」阿关预计年底和家人到带有夏日色彩嘅地方举行简单婚礼，原先他打算过两年二人世界再造人，但Joann叮嘱他年纪渐大要尽快做爸爸，唔想佢60几岁时，子女仲未成年。