独家丨邝洁楹大呻湿身拍SM拍足个几钟似真虐待 陈星妤唔介意「处女」外号跟一世
2023-06-03 07:00 
在TVB话题剧《一舞倾城》中饰演舞小姐的邝洁楹（Judy）、陈星妤（Yvette）和文凯玲（Connie），有大量极具踩界场口，如被SM及卖初夜等戏份。Judy呻拍摄SM过程好漫长绝对唔好受，同时又好期待献出荧幕初吻；而靠「处女」外号出位的 Yvette，就唔介意被叫足一世，只担心遭观众声讨真实性；至于一改戏路的Connie自觉拍得过瘾，但就惨被粉丝投诉。采访：杜杜 摄影：谭志光 发型:Terrence Chan@Hair Salon(Judy) 服装:Claudie Pierlot(Judy)
对于有机会参与王晶跟TVB的大制作，三女都表现得好雀跃，Judy更替作品一直被指抄《华灯初上》解话：「睇完就知一啲都唔似，似90年代港产片。」Connie 搭嘴：「少少似《应召女郎》。」Judy唔多认同：「似《古惑仔》系列多啲。」问Judy系咪因角色都叫「细细粒」？她即兴奋回应：「我梗系唔会话自己似黎姿啦！哈哈！」
Yvette唔敢同关楚耀有火花
2021年港姐出身的Yvette，第一次拍剧已孭重飞，她承认最初未识紧张，拍了一星期睇片先觉自己唔掂，即狂问导演同前辈恶补，好彩角色都系演初哥，「当然我唔系完全驾驭到，只系容易捉到个感觉，希望懵盛盛嘅感觉大家都觉得我做到啦！」讲到剧情强调是「万国城最后一个处女」，处女剧有此外号，随时跟足一世，她完全唔介意，「哗！跟我一世呢个朵都系一个成功嚟嘅，哈哈！」早前误爆20岁初恋时「失猪」的她，唔担心经常讲「处女」话题而尴尬，「应该好多人会声讨我未必真系（处女），但我都希望形象上可以符合返呢个朵啦！」
Yvette戏中有不少爱情动作戏份，既要被继父王俊棠企图强奸，再有卖初夜及为关楚耀献出第一次，她坦认有一定难度，「呢啲动作系难控制力度，要做相关嘅反应，好似俾爸爸强奸嗰场，系开工第二日，仲要嗰日拍足3场喊戏，好彩动作导演帮我先易啲入戏，同埋咁多人望住都好尴尬。」讲到跟求婚成功的关楚耀合作，Yvette称对方好照顾她，所以特别有火花，「戏入面啫！现实唔敢同佢有火花，佢好锡女朋友，每晚要返房打电话。」她又笑言对方多经验会带到入戏，「佢拍过咁多爱情动作片，好有经验嘛！哈哈！」
Judy极保守唔肯为艺术牺牲
戏中惨被SM的Judy，大呻拍摄过程相当辛苦，「我真实冇呢方面体验，事前有睇好多相关嘅戏，发觉都唔使准备太多，嗰日拍足个几钟，试晒唔同嘅刑具，仲要湿晒身，虽然力度会有唔同，但真系俾人打紧或者虐待紧，所以只要投入『细细粒』角度表现返出嚟就得，不过又要拍wide shot再补大头，过程都真系好漫长。」
Judy又投诉拍剧以来冇乜机会好好谈情，「今次都系冇，一嚟就SM罗！ 哈哈！我个荧幕初吻仲喺度㗎！」她坦认恨演爱情剧，「之前拍《罗密欧与祝英台》都有少少爱情线，希望公司再畀多啲机会我啦！但系除衫就唔需要嘞！」她指今次《一》剧已是性感底线，讲明不会为艺术牺牲，「睇戏见到女演员比较裸露或者意识大胆嘅戏，都会问自己会唔会为艺术牺牲？答案几肯定系唔会，又试过同演员朋友倾开，如果系拍荷里活级数电影？我答案都系唔会，原来我都系个几保守嘅人。」
Connie开心被粉丝投诉改戏路
跟王晶合作多次的 Connie，认为今次最大分别是女演员特别多，好热闹气氛特别好，她亦好锺意「Money」角色，「今次负责搞笑，唔使理靓唔靓，可以大动作啲夸张啲，系几好玩，睇剧本大家都担心我唔似，我平时畀人感觉斯文内向啲，依家出嚟觉得我够放，仲有粉丝话接受唔到咁样嘅我，我反而觉得几有满足感。」她又为角色苦练赌术及魔术，更预告「Money」除了惨被渣男男友所伤，仲会因烂赌而出事。
谈到跟前辈陈法蓉合作，三女都大赞对方戏里戏外都似「沙律妈」一样照顾她们，小粉丝Judy更自爆初次见面情况，「我哋搭车去佛山时唔敢打扰佢，试造型见佢整完头，我就叫佢『Kowloon』（《赌侠》角色名），哈哈！我好锺意《赌神》系列，睇咗好多次，短发女神！点解可以冇变㗎！每次同啲前辈合作都会有少少担心，但佢好玩得，佢有车成日主动话车埋我哋，系好细心照顾人嘅前辈。」
《星岛头条》新网站有更多精彩内容：http://www.stheadline.com/
最新回应