独家丨刘佩玥崩溃打沙包一秒入戏山聪赞劲力捧花旦唔怕伤打到脚筋暴现

2023-05-30 07:00

今年初，刘佩玥(Moon)在TVB台庆颁奖礼夺走大马视后，然后被助理总经理乐易玲点名成为力捧8位花旦之一，开晒绿灯重点推介，剧集监制争住要，「升呢」女一唔在讲，角色仲相当有发挥。日前她为文伟鸿新剧《夺命提示》拍一场有动作嘅内心戏，爆喊的Moon要疯狂打沙包发泄情绪，正式埋位时她一秒间入戏流泪，连前辈陈山聪都赞佢劲，更睇好佢两年内拎视后。采访：方骞平摄影：邓国良

Moon出尽力打沙包，从其白滑反光长腿可见，脚筋都现晒出嚟。

陈山聪睇好Moon两年内拎视后。

刘佩玥在文伟鸿的《隐形战队》中，演绎性感打女角色表现亮眼，今次于《夺》剧中晋身女主角，仲跟视帝陈山聪演CP。日前剧组晨咁早在拳馆开工，先拍摄阿Moon戏份，剧情讲她忆述和手下廖慧仪(Jessica) 往昔嘅打拳点滴，继而情绪崩溃，再喊住狂打沙包，令离远望到阿Moon一举一动的陈山聪相当心痛。

不擅拳击的阿Moon细心聆听武指指导，打完又打。

阿Moon打到攰，要坐低唞唞加努力培养情绪。

刘佩玥一秒间入戏流泪，七情上面。

受伤只怪自己论尽

《头条日报》记者直击，身穿背心短裤仔再加防走光黑色打底裤的阿Moon，先拍一啲打沙包镜头，唔识拳击的她用心聆听武指指导走位及出拳，因为timing、位置及动作要配合得天衣无缝，阿Moon打完又打，导演更不时提她出拳时唔好眯眼、要出力啲，虽然有啲难度，但阿Moon勇于接受挑战，拳拳用力搏到尽，擦到绷带外露的几节手指都损晒，不过，痛过后好快回复状态，还笑笑口不好意思说：「我成日唔想话俾人知我伤咗，唔想觉得我好论尽。」好彩之后喊住打嘅戏，拍咗几take搞掂，唔算太费力。

打到玉手损咗。

阿Moon忍住痛搽消毒药水。

打到几只手指骨位都红晒，皮又擦伤。

阿Moon忍住痛嘅趣怪表情。

镜头一转拍阿Moon跟Jessica打擂台戏，两人拳来拳往，不时中拳，阿Moon被身手灵活，闪得好快的Jessica击中小腿上五寸下五寸位置要敷冰，她反过来安慰新人Jessica：「冇事，唔关你事！」着紧身小背心晒小蛮腰的26岁Jessica身形抢镜，不过33岁阿Moon的白滑反光长腿都唔输蚀，连剧组女工作人员都话想摸吓！

着贴身小背心嘅廖慧仪样貌及身形都唔错，动作仲非常敏捷。

「铁人Moon」痛完继续做

阿Moon明白到拍拳击戏碰撞在所难免，要体谅及信任拍档，更自爆系「铁人Moon」，好似铁打咁痛完继续做，但否认受力捧才咁搏，强调：「任何演员都要有专业态度，无论咩位置都会咁坚持，做任何角色我最care就系要做到最好，要对得住自己及角色，大个女所有嘢都要向自己负责。」提到她白雪雪的光管脚好抢眼，她无奈笑说：「我都想晒黑呀！因为肤质问题只能晒红。(剧组姐姐都话想摸)哈！唔系，佢哋玩啫。」

今年初阿Moon眼湿湿夺走大马视后，非常惊喜。

刘佩玥于《隐形战队》中，性感打女造型引死唔少巴打。

山聪为头家狂跑数

另外，陈山聪指阿Moon属公司重要资产，大赞她精湛演技加上用心演好每场戏，如果撞多一个好角色，配合埋天时、地利、人和，可望2年内夺TVB视后。至于邵氏兄弟公布9大「焦点艺人」山聪亦榜上有名，他谦称只系其中一位要去搵钱嘅艺人，不过，坦言真系要为头家跑数：「未来10年都要努力搵钱，向住囝囝Jaco读大学进发，希望赚到佢嘅教育基金，𠵱家距离目标仲好远。」幸好温暖奶爸形象都带出商机，他跟陈豪、陈展鹏在广告界均有价有市，通关后收入都算唔错。