独家丨锺嘉欣拒做虎妈唔介意仔女入行结婚8年首公开夫妻长Keep热恋秘诀

2023-05-22 07:00

去年初锺嘉欣（Linda）大热倒灶失落TVB视后，好彩有贴心脊医老公Jeremy呵返，同年10月诞下孻女Anika，一家五口生活美满。状态大勇的锺嘉欣最近由加拿大返港拍瘦面机广告，Linda坦言心态已转变，清楚知道家庭是人生最重要，每日瞓醒起身个脑只系谂老公同为头家。作为幸福妈妈的Linda难得分享两公婆相处的情趣：「我哋会保持拖手仔，佢会赞我靓，感激娶到我…」她确信健康的夫妇关系会直接影响下一代。采访：方骞平

第3胎产后仅7个月就有工开，仲有得扮靓提升自信，Linda坦言好快乐。

Linda唔止身形fit到漏，仲愈嚟愈靓。

有「V煞」小颜面嘅锺嘉欣回港拍瘦面机广告。

留期期间不忘亲子乐。

状态大勇的锺嘉欣带埋3名子女及父母回港，第3胎产后仅7个月就开工，Linda形容好快乐：「除咗做完机效果好好，令到我好有自信外，最有趣系小朋友过埋嚟探班，佢哋终于知道妈妈系艺人会做啲乜，藉以身教，睇到妈妈认真嘅工作态度。」

锺嘉欣最近回港拍瘦面机广告，状态大勇。

记者会上大派心心。

老公心目中「女神」

Linda唔止身形fit到漏，仲愈嚟愈靓，她坚持就算做咗人母，身心都要Keep住靓，要保持做面部提升及运动，食有营养食物，多饮汤水，另外要有正面思想，远离负能量：「尤其人愈大，要清楚知道乜嘢系值得花时间，唔重要嘅事情就要放低。」问到是否老公心目中的「女神」？她笑说：「应该系啩，否则佢唔会娶我！」语毕Linda忍唔住放闪，再爆老公嘅甜言蜜语：「佢好多时话『老婆你好靓』，仲时不时会赞吓我『好幸运有你做我老婆』，不过结婚8年，大家都老夫老妻，老公唔会心心眼望住我，大家只会手牵手，希望健健康康一齐生活，好好培养3子女，等佢哋有一个安全地方成长。」

作为人母嘅Linda，穿上一件头泳衣又白又滑。

39岁索人妻锺嘉欣着泳衣在网上大派福利。

身形唔似3子女母亲。

惊喜现身杨茜尧与罗子溢女儿「小珍珠」3岁生日P。

Linda留港期间，带埋3子女同老友胡杏儿一家相聚。

和昔日「处女党」成员李亚男，一齐带埋小朋友去happy。

在港时去咗探可爱企鹅。

两公婆要以礼相待

谈及婚姻保鲜心得，Linda承认要经历高高低低嘅难关，平平无奇会唔健康，她两公婆都有拗撬，笑言拗撬系正常及健康嘅，要搵人挑战思维，谂嘢才有进步：「我同老公绝对系共渡患难嘅夫妻，我哋经历过好多嘢，所以感情都几稳固。」她寄语所有夫妻，就算系两公婆，记住对另一半有礼貌，唔好老奉，要唔该前唔该后，顾及对方感受：「我老公成日讲笑，话佢嘅位置已去到好低，咁我都会呵返佢，要畀佢知道佢系排第一位，子女喺佢之后，咁先可以畀子女见到，父母有健康嘅夫妻关系，呢方面会直接影响到小朋友成长。」另外，夫妻间要保持拖手仔及每周有一日拍拖时间，要多啲交流及倾偈；而且记住一个人冇完美，就算发生乜事都唔可以放弃对方。

去年10月尾诞下孻女Anika，一家五口超幸福。

嘉欣在港时与父母及子女去staycataion，三代同堂好开心。

脊医老公Jeremy视Linda为「女神」。

嘉欣承诺唔会放弃老公。

结婚8年，Linda婚后定居加拿大，两公婆恩爱甜蜜。

Linda选择在家分娩细仔Jared及孻女Anika，被赞非常勇敢。

去年返港参加台庆颁奖礼嘅Linda，可惜最终仅得「大马视后」。

点都唔会放弃唱歌

育有两女一子的Linda形容人生太美满：「每日我会同小朋友讲『我爱你』，尽量畀5至10分钟单独play time佢哋，唔会偏心，好彩因为有3个，佢哋学会share。」Linda唔做虎妈，平衡到休息及学习时间，她亦唔拒抗子女将来加入娱乐圈，会交畀个天安排，由佢哋自由发挥。𠵱家两公婆亲自照顾小朋友，所以需要长时间的工作，如返港拍剧，除非全家一齐飞返嚟，否则未必会拍：「只要一家人喺埋一齐就会舒服，最多两周左右短暂嘅分离。」不过，Linda坚持唔会放弃唱歌：「唱歌系我一世都锺意做嘅嘢，尤其作曲及填词，我有14首创作，最近都有作品，有时间会推出。」