独家丨姚焯菲留学三个月变圆碌碌之谜 大个女想单拖出走巴黎贪唔使Plan
2023-05-06 07:00 
姚焯菲（Chantel）年初到纽西兰升学，讲明不会放弃做歌手，最近她趁放假返港即推出新歌《小出走》，短短9日MV已过100万点击。不过冇见三个月，16岁仍处于发育期的Chantel明显圆润咗，难得当事人坦白，承认衰为食，同时又不忿被同事言语欺凌，已下定决心努力减磅。采访：杜杜 摄影：谭志光 发型:Hugo Poon@private i salon 化妆:King Yip@King’s Makeup场地:Studio Meta
《小出走》是Chantel第3首派台歌，属最喜爱的轻快曲风，录音也变得好玩，「之前两首歌系认真啲嘅抒情歌，冇得做啲扭音或者好开心嘅唱腔。」最令Chantel兴奋是摄制队远赴纽西兰拍摄MV，同行还有「声梦」的张驰豪（Aska）和潘静文，拍摄期间她亦搬到民宿跟Crew一齐住，「香港做完嘢会各自返屋企，今次可以一齐喺间屋倾偈同食饭，同埋我哋要走好多个景，Aska负责揸车，做完嘢揸返民宿都要个几两个钟，一路播歌一路倾偈，见到有靓景又停低影相，呢啲经历香港好少有，好似去旅行，好深刻好难忘。」
向高层呼吁想出Trip
新歌叫《小出走》，Chantel都希望大过啲可以试吓「出走」，首选一个人去巴黎，原因极奇怪，「因为巴黎唔需要点样plan，坐喺度饮吓咖啡同食牛角包。」同场的冼靖峰即质疑她，「去巴黎唔使Plan？」，她没好气反驳：「咩啫！会去Eiffel Tower（艾菲尔铁塔），跟住坐喺度饮吓咖啡，都系book酒店就冇啦！日本有太多嘢玩，好容易荡失路，一定要plan行程，但巴黎冇乜嘢玩，都系食嘢，想食边间餐厅咪入去罗！」暂时未能实行，她期望拍旅游特辑，「唔该！将呢条片send畀公司高层，我想拍一个旅游特辑，或者再一次出trip。」
目前要兼顾学业，返港后又要做歌手，Chantel反而认为这样安排更好，「功课还功课，工作还工作，两样都可以认真做！喺香港唔够时间做功课，𠵱家放假先返嚟开工，又可以认真返学。」Chantel在当地好快识到朋友，每日亦会跟父母视像联络，尚算适应得不错，唯一不惯是当地人爱着鞋入屋，「有地毡、落完雨对鞋湿晒都照踩入屋，佢哋又会赤脚行，跟住又照上牀，真系唔系好卫生，我仲未惯。」
被同事寸肥唔忿气
Chantel今次回港自觉有所成长，「唔见嘢好快搵返，觉得自己大个咗。」另外，她被指发福不少，问到下次返港目标？她直认想瘦，更嬲猪表示被同事寸佢肥，「B字头Y字尾（她经理人叫BY），成日紥一条辫嗰个！幕前嘅就Archie（同冼靖峰一样）都唔讲得太明显啦！哈哈！」对于有否针对部位？Chantel继续答得唔忿气，「面罗！其实全身都有！」
Chantel好老实，坦认在纽西兰饮食比较放纵，令体重有增无减，「我好想试纽西兰嘅嘢食，成日星期六、日会同roommate出去食早餐，有日食咗两间餐厅嘅早餐，哈哈！」加上又疯狂食零食，所以出晒事，「以为energy bar比较健康，唔知有朱古力同糖，以为减紧肥，其实一路增紧肥。」Chantel又指香港减肥容易好多，因为要做嘢冇时间周围食嘢，「嗰边一路读书就会同roommate食吓饼，食啲Nuts，几健康零食都好，都系会增肥。」不过她已下定决心，返纽西兰会食沙律为主，但强调减肥不会理磅数，「我骨天生好粗，同埋肌肉都会重，所以唔睇磅数，希望可以瘦过去年12月演唱会。」
《星岛头条》新网站有更多精彩内容：http://www.stheadline.com/
最新回应