头条戏场 丨《命案》祝大家长命百岁

电影主题是银河映像最拿手的宿命论，一个精神分裂的风水佬冒癫拯救心理变态后生仔的故事。有种师兄弟归位的感觉，由一开埸紧张到散场，全程Keep住坐立不安，浓烈黑色幽默及血腥暴力，集悬疑、惊悚、查案于一身，有唔少笑位仲要几励志，好睇喎。(上映中)  撰文:廖思慧
 

家栋住喺天台屋，好多重要戏份都系天台发生，呢幕又癫又鬼上身又正常，辛苦晒家栋。

因为剧情需要，Lokman在戏中经常食烟亦会讲粗口，演得自然奔放。

中文戏名好易令人误会系一般查案片，叫《命‧案》会唔会好啲?英文片名《Mad Fate》直译疯狂的命运，清楚明白晒。父母都有精神病的林家栋遇上嗜血茶餐厅太子爷杨乐文(Lokman)，经过多种算命方法知道对方会有一个火山级大劫，「好大镬，横跨20年。」家栋为帮对方改命搞到自己又癫又丧仲争啲死。根本两个人都唔正常，拍埋一齐睇吓边个条命够硬。

因为曾经错过一啲嘢，家栋好想帮人，见到Lokman「赤脉贯睛」随时杀人，尽救。

改唔到命就试吓改心，努力念经等心境平静。

家栋认为放生好大功德，可帮Lokman积福，但个天好有性格，唔系你畀就要，最终搞到成地雀尸，阴功。

做一个善良的人
《命案》个命系人命亦解作命水，好多人成日都话点解我老窦唔系李嘉诚？好丑真系命生成？戏中有大量改命加改运方法，例如忌火就咪食烟、屋企千祈咪放空雀笼、多行善、吉利说话要常讲。究竟「一切皆是命，半点不由人。」还是「万般皆是心，点点皆由人?」电影就系话你知，「你系可以拣嘅。」全场最印象深刻警察、凶手、热血风水佬及天生PK仔在面店同场一幕，嗰种一触即发真系睇到要深呼吸，好耐未试过睇港产片有如此观感。

家栋饰演江湖术士，紫微八字起卦乜都识，勉强帮到人但帮唔到自己。

Lokman对血有特别喜好，冇得解天生嘅，所以话佢变态其实好无辜，你估佢想㗎?

为帮Lokman改命，家栋怪招尽出，包括同死人换命。

被迫换命嘅Lokman，你睇佢几惊。

电影节奏明快，回味无穷，家栋由头带到尾，陈湛文令人心寒，Lokman非常有惊喜，论演戏他绝对是MIRROR的上弦，祝在影坛海阔天空。最重要临尾竟然被安慰到，多谢导演。

伍咏诗饰演一楼一，贪钱又烂赌，同样有大劫，仲搬正喺Lokman隔篱，累斗累。

睇新闻睇得多，啲变态杀手或者无差别杀人犯个样都好普通，但内心好凶残。

吴廷烨饰演警察，拉过童年Lokman，认定佢系变态人渣，睇死佢冇得改。

家栋经常望个天，究竟天命难违还是人定胜天?

《星岛头条》新网站有更多精彩内容：http://www.stheadline.com/