独家丨郑保瑞拣Lokman贪佢个样够怪信命水相士批做偏门阿妈安乐晒

2023-04-21 07:00

郑保瑞首跟游乃海合作拍新片《命案》，皆因好想知「我加游乃海会系点样」，但愈拍愈迷惘，他形容尾段好似视障人士跟着领跑员跑步，要完全信任对方。另外瑞导再起用林家栋外，还有全新班底，包括MIRROR队长Lokman（杨乐文）、陈湛文及伍咏诗（Sze Sze），提到拣Lokman及湛文的原因都几好笑。电影讲宿命，瑞导自爆入行后有风水师批他注定做偏门，令一直担心他做电影的郑母安乐晒。采访：杜杜

瑞导拍戏完全冇禁忌，「如果呢样又唔做得，嗰样又唔做得就唔使拍嘞！」

瑞导坦言唔识得处理喜剧，所以好早已跟游乃海单声，处理上会偏向惊栗感觉，「但拍落去发觉剧本唔系咁，有时会觉得拍错，要用第二啲方法，永远觉得着唔到力，去到尾唯有跟住剧本走，呢种不安全感去到剪片都不停出现。」至柏林和香港先后举行首映反应热烈，瑞导才较为放心，「有人话睇我啲戏会紧张到唔敢睁大眼，但今次好多人话笑得舒服，虽然我唔系专登当喜剧咁处理，但跟住乃海嘅剧本，今次靠近观众一啲，亦令自己跳出咗舒适圈。」

瑞导早前跟林家栋和Lokman现身柏林影展及出席《命案》全球首映礼。

瑞导在柏林影展大受影迷欢迎，不断被要求签名。

游乃海、瑞导及监制朱淑仪。

开心Lokman识回应对手

瑞导今次选角相当大胆，除了合作过《智齿》的林家栋外，Lokman、湛文和Sze Sze都是首度合作。在试镜时，瑞导已觉得Lokman是最适合人选，「cast呢个年龄层演员中，佢系最沉得住气同冷静，可能队长关系，呢样对我嚟讲系最安全，因为角色太特别，可以无限放大演到癫咗都得，但我哋唔需要咁，过份得滞就唔实在，同埋佢好快理解剧本要咁样演，仲有我锺意佢个样够怪，有啲似外国人会易记得。」最终瑞导跟监制杜琪峯等开会后，在三个人选中拣了Lokman。另外，开镜前一星期，瑞导不让Lokman拿走剧本作准备，只叫他即场睇完剧本消化及记低重点，「唔想畀佢谂得太多，因剧本实会改，佢消化咗做好多功课，去到现场我哋都抹晒，佢开头有啲迷惘，但拍得两、三日就放低呢啲问题去信导演，学识回应对手，听我讲唔好演而系入咗个角色，慢慢佢做到，我都好开心。」

瑞导爆Lokman为角色减磅落晒形，「佢试过坐喺街边等埋位，都冇人认得佢。」

Lokman在《命案》中，饰演天生变态嗜血成狂的茶餐厅少东。

睇ViuTV节目𥄫中湛文

至于选角时只演出过《三夫》的陈湛文，瑞导睇中他全因ViuTV节目，「唔记得咩综艺节目，有个人出嚟呃人，以为呃人嗰个系路人，咦！唔对路，咪系《三夫》嗰条友！我好深印象，觉得湛文有好多可能性，再谂返个角色就系需要一个唔太起眼嘅人，系大隐隐于巿嘅人，我相信佢会有呢种状态，因为佢拍《三夫》面对陈果都做到，哈哈！同埋佢读演艺又做开舞台剧，功底应该好好。」至于演凤姐的Sze Sze，瑞导都承认好大胆，最搞笑连Sze Sze经理人朱淑仪都没信心，「拣演员我要记得先，好锺意佢对兜风耳，几可爱五官好好，我同佢经理人即系《命案》监制讲『点解唔试吓Sze Sze』，佢话『你觉得佢得咩』，佢都怀疑，但睇咗佢《七人乐队—遍地黄金》嘅演出，当然杜生（杜琪峯）调教咗佢好多嘢，我觉得佢好稳定，又放得开，又好肯同我哋一齐去搵个角色，而且佢会好珍惜机会。」

陈湛文的平凡特质，反而成为被瑞导选中的主因。

Sze Sze饰演凤姐，瑞导欣赏她演得够放。

唔太迷信最多睇风水

电影以「一切皆是命，半点不由人」为命题，瑞导亦相信宿命，觉得自己整定做呢行，因做场记的日子，经常冇工开都冇想过转行，「冇嘢做半年，就跟啲朋友阿哥出去做装修，去大家乐做兼职，但电影嗰边打嚟话有散工做，我就即刻去做。」另外，入行初期已有相士指他适合捞电影，「嗰日我冇工开中午先起身，阿妈咁啱叫人上屋企睇风水，跟住个师傅望一望我就问我阿妈『你个仔做咩㗎』，我阿妈话『唔知呀，做电影嗰啲啦』，师傅就话『啱㗎嘞，佢唔做偏门都冇嘢做』我阿妈即刻安心咗，『好在佢做电影呢啲偏门，唔系佢偷呃拐骗咪死』，我咪成日同我阿妈讲『我系整定做呢行，师傅都系咁讲，你唔好再叫我转行啦』哈哈！」而瑞导有睇风水习惯，但未至于太迷信，「我每年都会睇风水，最基本会摆风水阵戴吓饰物，但我唔会将嗰样嘢成日记住，又真系试过冇睇两年屋企就有啲事发生，于是咪睇返罗！」