古天后日志｜成交淡静买卖两闲 中资死顶外资减持套现活之你

4月20日，大致多云，间中有骤雨及几阵狂风雷暴，天气和暖。美股业绩期，陆续公布业绩，奈何大部份公布业绩嘅股份，无论业绩好与坏，大部份低开，虽然有部份最终跌幅收窄，但仍以下跌为主。美股表现反覆，道指跌79点；标指变动不大，跌不足1点；纳指则微升3点。大摩营收及盈利好过预期，股价照样低开3%，其后倒升0.67%收市，市场仍然选择趁低吸纳。

至于唔少人关人嘅Tesla，收市后公布业绩，纯利跌22%符合市场预期，但毛利率则从19.3%急跌至9.7%，明显系减价以及成本上升所致，股价盘后急跌6%，且看今晚见唔见有买盘趁低吸纳。至于产能方面，公司今年目标为200万部，较去年150万部增长逾两成，营收或增长30%，公司舵手Elon Musk指今年战略系追求销量而唔系利润率，即系盈利方面，要睇毛利率会否进一步下跌。值得留意今年下半年将交付Cybertruck，成为公司新收入来源，另外市场很期待平价电动车Model Q，都有机会成为盈利增长动力。

至于港股呢边，科网股被减持嘅消息持续，自软银减持阿里(09988)、南非股东减持腾讯(00700)，京东(09618)被大股东自己队自己后，噚日轮到快手(01204)嘅CCASS多咗5100万股，市场自然联想到系腾讯呢个大股东要出货。不过腾讯就话唔系佢自己减，而系佢嘅拍档想减持，亲，都唔使分得太仔细，总之快手就系有成50球货摆咗喺CCASS等沽货套现。睇返噚日大市成交少得可怜，买卖两闲。大市仍然系好淡争持局面，全日喺20300至20600之间上上落落，个别股份自己围炉落镬炒，出好消息就引人入场高位接货，百度(09888)跟TVB(00511)就系最佳例子，呢啲食少多教训，无谓入场做点心。