独家丨Lokman承认MIRROR处低潮等反弹：放长双眼《命案》变身嗜血变态仔谂计整残自己

2023-04-14 07:00

MIRROR队长Lokman（杨乐文）在杜琪峯监制、郑保瑞执导及影帝林家栋主演的MakerVille头炮电影《命案》中，饰演暗黑茶餐厅太子爷，残样躁狂兼嗜血，成套戏Keep住目露凶光又要爆粗，为瞪大眼表现自然苦练多时。电影以宿命做主题，Lokman坦言信命间中亦会睇塔罗求安心。对于MIRROR近期负评排山倒海似乎好运已走，Lokman就叫大家放长双眼等睇他们谷底反弹！采访：杜杜摄影：朱伟彦发型:Seiko Sin@HairCulture化妆: Giann Cheung@Annie G. Chan Makeup Centre服装: Maison Mihara Yasuhiro、Christian Louboutin

Lokman在开拍《命案》一星期前，才正式为角色准备，心情特别紧张。

话晒公司头炮，担正的Lokman好紧张，好彩监制朱淑仪一句话令他放松，「句说话好劲『你紧张乜嘢啫！畀钱请你拍嗰个都未紧张，几时到你紧张』啱喎！咁就抛开咗。」初次跟郑导合作，他惊讶对方好温柔，而面对气场强劲的林家栋，最初亦不敢向他发问，特别是自己也觉蠢的问题，「点样可以做得好啲呀？系咪好蠢吖！知好蠢但好想问，去到尾先敢问，佢个答案点通咗我『都唔知㗎，信导演啦！你唯一可以做系信导演』好吖！跟你呢个信导演啦！」

Lokman跟林家栋及导演出席柏林影展的《命案》世界首映礼。

速减磅瘦到似唔健康

戏中Lokman又瘦又残，为了形神俱似，就算得一星期都尝试节食减磅，「想瘦啲凹啲再岩巉啲，睇落会再奇怪啲，冇谂住减几多磅，只想减到睇落去瘦到唔健康。」为将残样升级，Lokman连遮暇及粉底都冇用，「净系化黑眼圈，条眉搣得核突啲，将所有唔好嘅嘢放晒出嚟。」角色经常目露凶光，Lokman在表情管理亦下苦功，「练习点样擘得对眼大啲，但擘得太大，眉会皱埋额头会有好多皱纹，我就谂咗个方法，就系利用眼睫毛去擘大，系好抽象㗎！」为清楚表达，Lokman更搞笑地即席示范。「嗱！我𠵱家系用眼睫毛擘大㗎！系咪冇皱纹！？」

Lokman饰演的茶餐厅少东，经常目露凶光。

Lokman搞笑即席示范，用眼睫毛瞪大眼而冇皱纹方法。

相对讲对白，Lokman觉得杀戮场面已较易应付，「因为要交待情绪、表达到角色，要唔同层次好难，所以我NG得最多都系对白罗！」角色要爆粗兼食烟，他都零偶包，「粗口都系啲好人性嘅嘢，我喺镜头前面冇讲啫！唔代表我冇讲嘛！食烟都系角色嚟，做演员就唔好谂呢啲，谂太多就会演得唔好，演员就系要赤裸，掉低好多嘢构造返个角色，如果要孭咁重嘢上身，点样去呈现个角色啫！」

为角色Lokman极速减肥，瘦到面都凹晒。

戏中Lokman嗜血成狂好难演，感恩对手是影帝林家栋。

信命会睇塔罗戴水晶

《命案》以宿命为主轴，对于「一切皆是命，半点不由人」的命题，Lokman相当认同，「我信命，畀你喺呢个位置上，得到同得唔到都系有原因，呢一刻我点解系MIRROR队长，点解会接到《命案》，都有原因，我信呢样嘢。」他由舞蹈员到加入MIRROR，一切都是命运安排，「未真正入行时曾经有几个moment想转行，当决定嗰刻就会有个大job，又唔得闲几个月，《全民造星》前又系差唔多要转，跳舞可能系兼职，转做幕后跟场，做舞台FM、SM，但咁啱又有个比赛，令我可继续做呢行。」

2013年Lokman首度拍电影《狂舞派》，可惜当时未能成功入行。

Lokman自言未算太迷信，「有朋友睇塔罗，我有条手链佢穿嘅，通常维修时会睇埋。」他是抱着宁可信其有心态去睇塔罗，「睇完可能会令自己定啲，畀到个信心，好得意，我戴水晶系佢帮到我，定系我觉得佢帮到我而帮到我呢？我嘅自信提升咗，定系佢帮到我提升自信呢？唔理咯！帮到、舒服、『老黎』咪戴住。」不过当有重要事要决定，都唔会一开始就求神问卜，「做落咗先开始问，攞一啲信心，调节吓方向。」

平日不用开工，Lokman两边手都有戴上水晶链。

去年7月演唱会意外开始，MIRROR的负面新闻愈来愈多，更出现脱粉潮，似乎好运已用完，Lokman对此唔避谈，「啲运会转㗎嘛！成日讲八运转九运啦！冇可能永远系咁，永远系咁唔好睇！一定要有高有低，高嗰阵人哋睇你点样风光，低嘅时候人哋食花生睇你点低，再上返去人哋点睇你谷底反弹，再更加欣赏，我系深信有呢啲周期。」笑问呢位智者系咪叫大家等睇镜仔谷底反弹？杨队长答得好有信心，「放长双眼罗！」