独家丨金像奖前夕群星齐拣「死前必翻睇电影」 影帝张继聪严选爆喊科幻神作
2023-04-13 09:00 
第41届香港电影金像奖颁奖礼将于周日晚（16日）举行，本届竞争相当激烈，为缓和气氛，特别搵嚟凭《窄路微尘》首夺最佳男演员，亦是金像奖大热影帝的张继聪，胆拖 一众 TVB、ViuTV艺人、导演及资深演员，严选死前必翻睇电影，笑片、爱情片、法国片及港产片乜都有，睇吓有冇你哋嘅心水。(另外，篇幅所限，详细版请登入《星岛头条》APP。) 采访:杜杜、方骞平 撰文:廖思慧
张继聪
电影:《星际启示录》(Interstellar)
「我谂死前一定好恐惧，一定好惊，心里面有啲好烂嘅戏，睇到一半就好想快啲死，解决咗死前嘅恐惧，就例如....我梗系唔会讲边套啦， 正面啲，拣《Interstellar》，讲紧宇宙嘅维度，爱啦，喺我嘅信念里面，人死咗唔系真系死咗，只系肉身嘅完结，灵魂嘅旅程系不灭嘅，睇得明你又有啲启发，就唔会惊死，只系出发去另一个阶段，睇完套戏就上机，去第二度玩，系咪好正先?」
梁祖尧
电影:《雾地异煞》(The Mist)、《正义回廊》（The Sparring Partner）及《小飞象》（Dumbo）
「唔想乱咁答，个脑有500套电影LOAD紧，第一部会拣《雾地异煞》(The Mist)，突然出现啲浓雾，啲雾入面有怪兽，成班人困喺超市出唔到去，一出去就会死，超市入面出现咗个小社区，有唔同宗教唔同性取向嘅人，变成咗个社会，呢套超级好睇，好精彩嘅演技同剧本，我成日会翻睇，每一次睇都会得到唔同嘅嘢。」
「第二套拣《正义回廊》，一套非常值得支持嘅本土电影，两个舞台剧演员麦沛东、杨伟伦，有私心，两个都合作过，好好嘅演员，两个演大角咀支解父母案嘅犯，当年系一单奇案，个仔高调搵父母，其实当时已经杀咗，呢件事太传奇，好锺意呢套电影，拍得好好，好好睇。」
「第三套，《小飞象》，情意结，由细睇到大，每次睇都会喊，心灵有缺失时就会开嚟睇，买过好多版本，有录影带有LD，VCD， DVD，到蓝光，到online streaming，一揿就睇到。由细到大有唔开心就会拎出嚟睇，睇到而家。天生有缺憾嘅大笨象，但佢搵到佢另一才能就系识飞，正能量到爆炸，识飞之后变成另一个自己，虽然细个好锺意，但系一套畀大人睇嘅卡通电影。」
吴炜伦(《毒舌大状》导演)
电影：《天使爱美丽》（Le Fabuleux Destin d'Amélie Poulain）
「当年心情唔好睇呢套戏，睇完出嚟觉得个世界美好咗，个冲击力对我嚟讲系好大，因为呢套真系一套好美丽好善良嘅戏，原来世界真系有美好一面。人生中最后一套戏，我觉得系呢部。」
赵善恒 (《一秒拳王》导演)
电影:《玩转身前事》(The Bucket List)
「讲两个身份地位好唔同嘅人都要面对死亡，两个喺医院识咗之后，发觉大家都有啲嘢好想做，逐个剔走想做事项，好感人嘅戏，临死前好啱睇。」
马国明
电影:《JOKER小丑》(JOKER)、《华尔街狼人》（The Wolf of Wall Street）及《铁达尼号》(Titanic)
「作为一个演员，一套就太难拣，我会拣两套，一套系《小丑》，又或者系《华尔街狼人》，每一场戏每一个演员，每一句对白，都系build up个主角，成套戏所有嘢都系帮个主角，营造佢嘅character，作为演员遇到啲咁嘅角色，等同中六合彩。」
「如果同阿汤一齐睇，就会拣《铁达尼号》，女仔锺意睇爱情片，戏入面嗰段情真系好浪漫，虽然我无里安纳度咁靓仔，希望再一次感动到佢。」
王浩信
电影:《真人Show》(The Truman Show)及《喜剧之王》（King of Comedy）
「即刻谂起两套喜剧，一套系周星驰嘅《喜剧之王》，好多时喜剧系讲一啲悲剧嘅人生，睇戏好多时想睇到强烈嘅矛盾同冲突，令我哋睇到好爽，同有共鸣，《喜剧之王》尹天仇个角色，可以影射到好多小人物嘅心声，经过自己努力，再一次又一次经历好荒谬嘅情景，而一步一步去经历佢嗰个阶段嘅人生。」
「另一套睇得好开心，有笑有泪嘅系占基利嘅《真人Show》，讲一个人喺被创造世界里面，完全唔知自己嘅世界被创造，好多Cam拍住佢，系人生悲剧，剧本嘅冲突同创意都好强，亦有好强烈嘅讽刺性同戏剧性，占基利当时抛低咗之前一贯嘅演出模式，好值得睇。」
Babyjohn
电影:《真的恋爱了》(Love Actually)
「死前必睇嘅戏一套就够，因为已经临死，好多嘢要做唔好剩系睇戏，套戏好开心，因为临死嘞，感受返爱几咁温暖，亦可以从新去拥抱屋企人，系电影最重要嘅信息，第二系捉紧眼前可以做到嘅嘢，尽做。」
林嘉欣
电影:《首演之夜》（Opening Night）
「有导演叫John Cassavetes. 6、70年代拍美国独立电影，所有电影都好值得睇，因为好少资源就拍到一啲当时美国电影见唔到嘅嘢，佢好锺意哄得镜头好埋，睇到演员嘅表情同心理状态，点样慢慢转移，好精彩。佢同太太Gena Rowlands有套作品叫《Opening Night》，讲一个做话剧嘅酗酒女演员，一开场好震憾，全程用hand-held 拍摄。女演员好叻，从一个切割位进入角色。」
陈豪
电影:《时光倒流70年》（Somewhere in Time）
「好感动嘅电影，为咗呢部戏去学钢琴，识弹呢首歌，亦系我咁锺意呢部戏嘅原因。」
强尼
电影：《寻找快乐的故事》（The Pursuit of Happyness） 及《呖咕呖咕新年财》（Fat Choi Spirit）
「咁多电影，死前必睇点只三套，我就会分类，FOR任何人死前都可以睇嘅，差唔多自己最锺意嘅电影，就系《寻找快乐的故事》，呢件系真人真事，当你喺人生唔同嘅阶段，可能系好失意好失落嘅时候，你睇呢个故事，你会觉得，唔系吖，自己唔系咁惨啫，原来有啲人，要揽住个仔瞓公厕，顶住度门，咁都捱得过，之后会有好嘅日子，调返转，当人顺利嘅时候，自己做少少嘢可以帮到人，改变到人哋嘅生命，所以我好锺意呢套戏，锺意得好紧要。」
「第二套系《呖咕呖咕新年财》，香港人死前必看，好劲嘅经典电影，咩年代睇都系一套好Update嘅电影，冇旧嘅感觉，我好奇怪，如果你系香港人，无理由无睇过，你系咪无朋友无亲戚无过过新年，如果唔系无理由无睇过，所以作为香港人，死之前一定要睇 。」
「第三套留白，好希望呢套系自己拍嘅电影，好希望自己死前有机会睇到一套我认为系代表作嘅电影，或者系人哋死前觉得都想睇强尼拍嘅戏，好希望有一套咁嘅戏出现。」
陈俞希
电影:《伊朗式英雄》（A Hero）
「讲一个路不拾遗嘅故事，当你觉得做紧好人好事嘅时候，好多人会怀疑你，会质疑你，最后或者为你带来灾难，睇戏好有感觉，人就系咁样，做啲好嘅事，人哋未必领情，亦会误解你，你会唔会继续坚持做个好人？睇完电影，好多反思，自己会唔会做质疑人嘅人。」
黄宗泽
电影:《辣手神探》（Hard Boiled）
「有我两个偶像，发哥同伟仔，两大影帝同场已经好好睇，最后打嘅长镜头，系好经典嘅镜头，一闩门走景转景，虽然有啲瑕疵，当年只能够用呢个方法去做，咁经典嘅镜头值得大家去睇。」
袁剑伟 （《季前赛》导演）
电影:《智取威士忌》(The Angels' Share)
「临死拣一部轻松少少，有啲温情有啲感觉嘅戏，英国导演Ken Loach，2012嘅电影，又开心又感动，乜都有，非常好嘅一部戏。」
贾胜枫 (《流水落花》导演)
电影:《奇迹》（I Wish）、《绿洲曳影》（OASIS）及《爱情万岁》（Vive l'Amour）
「首先系是枝裕和《奇迹》，拍小朋友拍到最纯真嘅一面，我心目中拍小朋友拍得最好嘅电影，大家都要睇吓。」
「第二套系李沧东嘅《绿洲曳影》，表面上系好难睇，男女主角都有啲唔正常，一个痉挛一个轻度弱智，但拍到两个之间非常美丽嘅爱情故事。」
「第三套蔡明亮嘅《爱情万岁》，全套戏得三个人，一间屋发生嘅故事，非常好睇，想用低成本拍一个有趣故事嘅可参考。」
《星岛头条》新网站有更多精彩内容：http://www.stheadline.com/
最新回应