独家丨Winka首公开分手原因惊爆有圈中新对象 奇怪「消费」风波强调冇做错嘢
2023-03-30 07:00 
COLLAR成员Winka（陈泳伽）单飞出新歌《一手造成》，歌曲内容是向前度道歉，Winka讲到明主人翁是去年6月分手，拍拖6年的歌迷会会长Calvin Tam，因而被网民轰「消费」前度，Winka难顶人格被质疑出Po反击，愈讲愈衰更惨被围攻。Winka一直透露「步伐不一致」是分手原因，原来分手真相是跟前度做人冇目标有关，Sell坦荡荡的Winka更自爆有了解中对象，希望访问出街后，Winka的社交平台安好啦。采访：杜杜 摄影：Stanley 形象:Exactly the Sam 发型:Taurus Lee 化妆:Percy Shing 服装:Harvey Nichols Hong Kong、APM Monaco
Winka认为做音乐的好处，就是将讲不出口的事，透过音乐表达，如新歌就是想向前度道歉，「我好锺意说教，令对方辛苦，有啲说话会hurt到佢，例如我会话『点解你个人咁冇目标』，佢的确系嗰个状态，我好想提佢，试过好多方法，但系佢Get唔到，不过谂返转头我系咪需要讲呢？其实唔需要，有啲责任我唔需要take，take咗自己又做咗衰人又伤害咗佢。」
去年已搬离同居爱巢
Winka坦言跟Calvin分手的导火线跟她入行有关，「入行后佢冇办法陪我工作，我做访问、我好攰佢唔喺隔篱，佢唔知道我有几攰，有几唔开心，佢本身唔算系主动嘅人，佢心灵层面嘅安慰好叻，但系有时我太攰未必会主动讲，佢又未必会主动问，就生疏罗！」不过她强调两人是和平分手，「好似𠵱家咁倾偈deep talk，去到最尾就分开，佢都唔想逼我，亦觉得要有多啲空间再成长。其实上年对我打击都几大，团嘅嘢同私事，眼利嘅都会知我开live背景系转咗，因为我搬咗地方。」暗示早已搬离同居爱巢。
对于结束6年情，Winka也觉得好可惜，但想通了就释怀，「我哋𠵱家呢种朋友同家人嘅关系，其实系最永久，唔会再有分开，彼此最了解，有咩事依旧可以去讲，你会话我听你嘅角度，有咩都可以同我分享，我系唔会缺席，但唔再系枕边人罗！我哋唔系好紧密联络，但佢陪咗我一齐追梦咁耐，我一啲好重要嘅Event，如之前同So Ching（苏芷晴）个音乐会，佢都想嚟见证，我都好欢迎，开心佢出现。」
再拍拖唔会即刻公开
Winka作为艺人无惧公开感情事，「𠵱家啲后生仔女好惯性喺社交平台分享自己嘅嘢，我本身性格比起同龄嘅人更加赤裸裸、坦荡荡，所以我会觉得OK，感情有合有分，唔系咩错事，加上我冇做错嘢点解要怕讲出嚟啫！有时愈唔讲愈多空间畀人幻想，反而讲咗你唔使再追问，观众知道咗，我都可以好好咁生活落去。」本身多异性朋友的她，更不会避忌跟异性单独约会，「嗰啲异性朋友真系识咗好耐，10年8年咁，会单独食饭、攀石同喺海傍倾偈，我唔避忌㗎，出嚟都唔戴口罩。」
坦荡荡的Winka更公开已有了解中对象，对方更是半个圈中人，「佢想向呢方面（娱圈）发展，好想做但现实未必会做，所以一半半罗！都系识咗好耐嘅朋友，因为识咗咁耐先至更加要谨慎处理，唔好咁快有结论，关系系慢慢发现、发掘同培养，会好过一锺意就一齐，嚟得快亦都走得快。」不过她就算正式拍拖，今次不打算即刻公开对方身份，「公开对佢唔公平，唔系人人都接受到，我6年嗰个ex佢接受到我会公开，加上唔想俾人感觉我哋一齐咗，但系可能半年又分开，反而真系好稳定先同大家介绍呢个人，有少少似大众就系我家长。」若然在街被歌迷见到拍拖，她亦不会隐瞒，「我唔会喺传媒面前话呢个人系我男朋友，如果大家喺街撞到我，我唔会否认，同埋我咁样松手好hurt嘛！」
新网站 www.stheadline.com 已推出
最新回应