独家丨张继聪负评中死唔去：抨击我嘅人都系菩萨怕失眠尿频唔敢谂冲击金像影帝

2023-03-27 07:00

43岁的张继聪(Louis)早前凭电影《窄路微尘》在电影评论学会大奖首夺影帝，由于强敌当前所以唔敢谂再下一城冲击金像奖。多年前曾被传媒以「废柴老公」形容的他坦言影帝奖座好重要，但并非振夫纲宝物，因为唔再介怀闲言闲语。贵为娱圈道理王，开口埋口劲多大道理的张影帝笑言：「当米高佐敦打篮球咁劲，都被批评神化咗时，我仲有乜嘢好讲？释怀啦。」至于曾在负评海中「遇溺」，已被训练到坛数好高的阿聪已懒理，「吓吓要证明畀人睇，到死都唔会完。」采访：方骞平摄影：邓国良场地：富豪国际酒店集团富豪香港酒店

张继聪坚持自己是有自信的好演员，就算输都虽败犹荣。

阿聪坚持做人唔可以输畀自己。

阿聪拍每套戏都尽最后一分力演出。

阿聪演戏好自我。

张继聪喺演艺路上遇到唔少菩萨。

阿聪曾被传媒屈为「废柴老公」。

童星出身的张继聪，入行后拍咗47套电影，今年分别凭电影《窄路微尘》及《饭戏攻心》提名角逐「第41届香港电影金像奖」影帝及男配，他完全冇谂过可以连中二元并搞笑说：「如果咁谂太丧心病狂、好高骛远喇，年青人应该踏实啲…」他认为入围五强一定已达到出色水准，只系评审品味问题，加上角逐的都是满意作品，所以值得开心：「尤其香港电影票房好咗，讨论度高返好多，否则就算叻到会飞，擸晒所有奖，冇讨论度可以玩得几耐呀？」

阿聪好喜欢电影《窄路微尘》，传达人要互相包容，好有人情味。

阿聪演嘅《饭戏攻心》，搞笑得嚟充满香港味道。

影后心水郑秀文

张继聪指角逐对手系仰慕的黄秋生、刘青云；跟麦沛东及杨伟伦又曾合作：「佢哋做得好好，《正义回廊》又成功。」不过阿聪永远对自己有信心，因为从来唔会交行货，每次都尽晒最后一点力，唔要输畀自己：「人哋嗰啲(戏)系航空母舰，我哋唔系舢舨仔，都算系一只橡皮艇，成班后生仔划到出公海唔反艇仲想点呀？经已好开心啦，再谂就会失眠口乾、尿频、心跳加速、肾上腺素飙升！惟一思考点样分身行红地毯，据以往经验要Mark定化妆师帮我印面油，同埋要买定零食放喺凳底，镜头以外快食嚟充饥，坐喺我附近嘅就有福喇，反而攞唔攞到奖鬼知咩，呢啲都控制唔到。问到影后心水?阿聪表示，「个人喜好系郑秀文；私人分会留畀拍档袁澧林。」

张继聪及郑秀文率先获电影评论学会颁发影帝及影后。

为免有太大压力，讲求养生的张继聪饮中药调理身体。

张继聪早前凭电影《窄路微尘》在电影评论学会大奖首夺影帝。

心态90几楼咁高

如果摷埋金像影帝，张继聪坦言有助日后拍戏时，在剧本上的参与度可以去到另一个阶段。问到系咪会升Grade，拉近跟天后级老婆谢安琪的距离？他答得淡然：「我个心态有90几楼咁高喎，重点已唔再介意啦，如果要证明畀人睇，呢个游戏到死都唔会完，就算夺得金像影帝，啲人都会『唓！』咁我系咪要攞埋奥斯卡？最惨为咗啲得闲街坊，无聊打几只字话『靠老婆，垃圾嚟嘅』去夺奖。人哋对我睇法永远有佢嘅自由，我都有我自由去认同或者唔认同，更加有自由点样过人生，同埋经过以前密集式(负评)训练仲有乜好介意呀！几十岁人唔使谂振夫纲啦。」

阿聪有个健康融洽家庭，所以能全心全意放喺事业上。

阿聪有机会上金像奖颁奖台致谢词嘅话，一定会多谢老婆谢安琪照顾得屋企超好。

同老婆谢安琪多年来恩爱不变。

尽快实现导演梦

张继聪坚持有讨论区就有讨论，作用就是表达睇法及宣泄情感，连米高佐敦打波咁劲都被批评就学会释怀，作为好演员，有冇做好角色最重要：「就算我几努力，𠵱家仲有人对我有偏见，我要为嘅都为支持者，而唔系呢啲缘份较浅嘅人。」他慨叹呢行要被评头品足，受人抨击好残酷：「坦白讲，就算行外人喺茶水间、喺fb俾同事及朋友讲坏话都会唔开心啦，庆幸年轻时遇到难行嘅路，令我慢慢搵到自在感觉，抨击我嘅人都系菩萨。」阿聪又坦言唔系靓仔又冇天生明星相，注定要行实力派，都系天意安排。他又透露会努力实现导演梦，但唔会搵谢安琪演出，费事闹交收场。