独家丨马国明呻男艺人之苦：拍亲热戏觉得你搏懵曾助岑丽香同监制拆掂唔拍咀戏

2023-03-24 07:00

马国明相隔13年于《隐形战队》再演警察，更自夸拍动作戏又fit又有型，因为开枪可以唔眨眼，「呢套戏我系No.1」。讲到同刘佩玥（Moon）的亲热戏，他强调事前唔使同未婚妻汤洛雯（靓汤）通报，同样亦唔介意靓汤拍亲热镜头，他坦言：「电视尺度冇咩可以拍到出嚟啦。」另外提到可以再跟佘诗曼合作，马明双眼发晒光表示好期待。采访：杜杜摄影：谭志光

马明睇靓汤锡其他男对手竟然唔介意，仲会搞笑研究点样拍。

马明认为拍亲热戏，男演员会觉得更尴尬。

马明在《隐形》演总督察「Ocean」，虽然有大量动作戏，加上开拍前两星期才知顶替陈展鹏，但好彩他有踢开波，体力上唔难应付。招积位仲有一项，就是开真枪可以唔眨眼，「呢套戏我系No.1，唔系训练有素，我都唔知点解，阿Moon就话我点解拍枪战又唔眨眼，耳仔又唔使塞绵花，因为我样样感官都迟钝过人，我又真系冇佢哋咁敏感，哈哈！但系镜头出咗嚟，我都觉得自己有型。」

剧中演总督察的马明，拍开枪戏可以完全唔眨眼，被笑反应迟钝。

唔介意代女拍档出声

讲到跟Moon的亲密场口，马明出席记招坦言熄电视唔敢睇，准新郎解释只是搞吓气氛，「监制文伟鸿会安排吸引观众眼球嘅戏，搵靓女着得性感，再用性感去包装喜剧感觉。」不过他承认拍此类场面较女演员更尴尬，「熟还好喎！大家知咩事，如果唔熟去锡，导演又嫌唔够，睇镜头唔觉好爱要做多啲，唔知个女仔点谂，会觉得你搏懵，呢啲唔熟就会好尴尬罗！」

马明跟Moon在剧中有不少亲热戏，他认为大家熟络，拍起来不会尴尬。

马明解释Moon和刘颖镟的性感戏份，为吸引观众眼球兼增加喜感。

马明拍亲热戏前唔使向靓汤通报，「好坦白讲电视尺度冇咩可以拍到出嚟，最多拍个意识畀观众睇，好多嘢出唔到街，𠵱家《隐形》8点半出街，合家欢时间，好多嘢做唔到。」马明亦唔介意靓汤拍亲热戏，一齐睇之馀又会研究点样拍，「仲话佢『你系咪拍得好辛苦，扭晒360度咁，扭住个身去锡』。」而靓汤就当然唔想睇未来老公同人亲热啦。马明指婚后唔会避忌拍亲热戏，但会担心女拍档感受，亦唔介意帮对手同导演拆掂佢，「有时遇到啲新人，唔够胆做到剧本咁。我反而介意佢唔出声，又拍得唔开心，拍戏最紧要大家开心，拍唔到嗰个效果不如唔好拍啦！尴尴尬尬10 take都未搞掂，嗱嗱声1 take搞掂咪好，我又可以返去睇猫，哈哈！大家早啲收工。」他又提到曾经助岑丽香跟监制商量避拍亲热戏，合作更加舒服。

马明表示跟靓汤计划旅行结婚，会到外地影婚纱相。

马明有同靓汤一齐睇她跟谭俊彦在《失忆24小时》的激咀戏。

马明拍《宝宝大过天》时，岑丽香讲明老公介意她拍亲热戏，于是跟监制商量避拍，反而合作更舒服。

期待向阿佘好好学习

马明讲明婚礼决定权交晒畀靓汤，自己只负责配合，而他预计婚后会以家庭为重，就好似陈豪一样，「我同佢拍《白色强人II》，佢一收工就赶返屋企睇小朋友，哈哈！我谂我将来都会系咁，我𠵱家养咗两只猫，有时出街出得耐，开工长时间，都好想返去望一望佢哋，阿汤喺屋企都好啲，如果阿汤又有嘢做，我都会成日心挂挂，我谂同养个人仔差唔多。」

马明相信婚后会似足老友陈豪，变成住家男人。

马明自从跟靓汤同居兼养了Ariel和Valentino后，慈父样出晒嚟。

讲到继2017年《赌城群英会》后再跟佘诗曼合作新剧《NEWS新闻女王》，马明相当期待，因为好享受跟阿佘合作，「首先阿佘好专业，演技真系好好，虽然我做咗咁多年，有时有啲嘢睇唔透或者有两、三个选择时，我都会问阿佘用边个fit啲，男仔同女仔睇又唔同，阿佘系好畀到信心你嘅对手，佢选择得90%唔会错。」他认为阿佘在内地发展几年，拍过好多好劲的监制及导演，战斗力会再提升，「会抱住一个向阿佘学嘢嘅心态，虽然我大过阿佘，但阿佘做主角时，我仲系做紧甲乙丙，好似《十月初五的月光》就系佢澳门大学同学甲。」